काठमाडौं । साेमबार राती नेपाली सेनाको बख्तरबन्द गाडीहरु राजधानीको चक्रपथमा नियमित अभ्यासका लागि निस्कने भएकाे छ ।

युद्ध र अन्य संकटका बेला प्रयोग गरिने ‘बख्तरबन्द’ गाडीहरूको प्रयोगसम्बन्धी अभ्यास गर्न नेपाली सेनाको बख्तरबन्द गाडीहरु राजधानीको चक्रपथमा निस्कने भएकाे नेपाली सेनाले जनाएकाे छ । 

आउँदाे बुधबार पनि देशका विभिन्न स्थानका ८ वटा पृतना अन्गर्तगतका मेकनाईज्ड युनिटहरूले बख्तरबन्द गाडी देशका विभिन्न स्थानबाट सडकमा निकाल्ने बताइएको छ ।

नेपाली सेनाको नियमित अभ्यास योजना अनुसार यही माघ १९ गते राती वख्तरवन्द गाडीहरुले काठमाडौं चक्रपथको चक्कर लगाउने योजना रहेको । त्यसैगरी, ८ वटै पृतना अन्तर्गतका मेकनाईज्ड युनिटहरूबाट माघ २१ गते देशका विभिन्न स्थानहरुमा वख्तरवन्द गाडीहरुको अभ्यास गर्ने योजना रहेको जानकारी गराउदछौं ।

— NASpokesperson (@NaSpokesperson) January 31, 2021

सोह्र वर्षअघि २०६१ सालमा माघ १९ का दिन तत्कालीन राजा ज्ञानेन्द्रले प्रधानमन्त्री शेरबहादुर देउवालाई पदच्यूत गरी शासनसत्ता हत्याएका थिए । त्यसदिन पनि सडकमा सेनाका बख्तरबन्द गाडी निस्केका थिए, जताततै सैनिक तैनाथ थिए । 

आज माघ १९ का दिन नै म्यानमारमा पनि सेनाले शासनसत्ता हत्याएकाे छ । इतिहास भएको माघ १९ धेरै नेपालीको स्मरणमा भइरहेकाे बेलामा नेपाली सेनाकाे बख्तरबन्द गाडीहरु राजधानीमा देखिने भएका छन् ।