काठमाडौं।  सर्वोच्च अदालत बार एशोसिएसनले सर्वोच्च अदालतको न्यायाधीशमा सिफारिस नहकुल सुवेदीको योग्यता नपुगेको निष्कर्ष निकालेको छ । सर्वोच्च बारले यसबारे गम्भीर हुन आग्रह गर्दै संसदीय सुनुवाइ समितिलाई ज्ञापन पत्रसमेत बुझाएको छ ।

न्याय परिषद्ले २८ फागुनमा सर्वोच्चको न्यायाधीशका लागि उच्च अदालतका मुख्य न्यायाधीशहरु कुमार चुडाल र नहकुल सुवेदीको नाम सिफारिस गरेको थियो । उनीहरुको संसदीय सुनुवाइ गर्ने तयारी छ । संसदीय समितिमा पनि सुवेदीको योग्यता नपुगेको भन्दै उजुरी परेको छ । सर्वोच्च बारको सल्लाहकार समितिको बुधबारको बैठकले पनि सर्वोच्च अदालतको न्यायाधीश हुन सुवेदीको योग्यता नपुगेको भन्दै सुनुवाइ समितिको ध्यानाकर्षण गराउनुपर्नेमा जोड दिएको थियो । त्यसअनुसार सर्वोच्च बारले शुक्रबार सुनुवाइ समितिका सभापति लक्ष्मणलाल कर्णलाई ज्ञापनपत्र बुझाएको छ ।

संविधानको धारा १२९ को उपधारा ५ अनुसार सुवेदीको योग्यता नपुगेको र संविधानको मर्म र भावना विपरीत उनको नाम सिफारिस भएको भन्दै सर्वोच्च बारले यसप्रति गम्भीर हुन आग्रह गरेको हो । सुवेदीको नियुक्ति सिफारिसविरुद्ध सर्वोच्चमा परेको मुद्दामा चैत ३० मा फैसला आउँदैछ ।