काठमाडौं।  प्रधानमन्त्री केपी ओली र नेपाल कम्युनिष्ट पार्टीका महासचिव नेत्रविक्रम चन्द विप्लवबीच भेटवार्ता भएको छ।  

भेटमा नेपाल सरकार र विप्लव नेतृत्वको नेकपाबीच भएको ३ बुँदे सहमति कार्यान्वयन गर्नेबारे छलफल भएको प्रधानमन्त्रीको सचिवालयले जनाएको छ। 

गत फागुनमा भएको सहमतिअनुसार कारागारमा रहेका आफ्ना नेता र कार्यकर्ता रिहा गर्ने काममा ढिलासुस्ती भएको भन्दै विप्लव प्रधानमन्त्रीलाई भेट्न पुगेका हुन्। भेटमा पार्टी प्रवक्ता खड्गबहादुर विश्वकर्मा प्रकाण्ड पनि सहभागी रहेको बताइएको छ। 

सरकार र विप्लव नेतृत्वको नेकपाबीच गत फागुन २० गते ३ बुँदे सहमति भएको थियो।  उक्त सहमतिमा सरकार र सो समूहबीच राजनीतिक विषयहरुको समाधान संवादको माध्यमबाट गर्ने, विप्लव समूहका सम्पूर्ण राजनीतिक क्रियाकलापहरू शान्तिपूर्ण रुपमा सञ्चालन गर्ने र सरकारका तर्फबाट लगाइएको विप्लव नेतृत्वको प्रतिबन्ध हटाउने, राजनीतिक बन्दीहरुको रिहाइ गर्ने र मुद्दा खारेज गर्ने विषयहरु समेटिएका छन् ।