काठमाडौं । विश्वस्तरीय कुराकानीमा आधारित कृत्रिम बुद्धिमत्ता (Conversational AI) कम्पनी मेलिङ्गो एआईले नेपालमा औपचारिक रूपमा आफ्नो सेवा सुरु गरेको छ। नेपाली बजारका लागि यो प्रविधि ब्लु ओभल इन्टरनेशनल प्रालिसँगको विशेष साझेदारीमार्फत उपलब्ध गराइएको हो।

कम्पनीका अनुसार मेलिङ्गो एआईले अत्याधुनिक एजेन्टिक एआई प्रविधिमार्फत ग्राहकहरूसँग २४/७ मान्छेजस्तै स्वाभाविक, आकर्षक र बहुभाषिक संवाद गर्न सक्ने समाधान प्रदान गर्दछ। यो प्लेटफर्म विशेषगरी ई–कमर्स, ग्राहक सेवा तथा लिड रूपान्तरण जस्ता क्षेत्रमा प्रभावकारी मानिएको छ।

मेलिङ्गो एआईका एजेन्टहरूले वेबसाइटका आगन्तुकसँग तुरुन्त व्यक्तिगत संवाद गर्ने, जटिल ग्राहक प्रश्नहरू बुझेर सही जवाफ दिने, बिक्री सहयोग स्वचालित बनाउने तथा रूपान्तरण दर बढाउने क्षमता राख्ने बताइएको छ। साथै, थकानबिना निरन्तर उच्च गुणस्तरको सेवा दिने र इनभेन्टरी, मूल्य तथा अफरजस्ता वास्तविक समयका डाटालाई संवादमा समावेश गर्न सक्ने विशेषता पनि यसमा रहेको कम्पनीले जनाएको छ।

उन्नत प्राकृतिक भाषा प्रशोधन (NLP) र लामो समयको अनुसन्धानमा आधारित प्रविधिका कारण मेलिङ्गोका एआई एजेन्टहरू सामान्य च्याटबोटभन्दा धेरै अगाडि रहेको दाबी गरिएको छ। यी एजेन्टहरूले उच्च प्रदर्शन गर्ने मानव सेल्स तथा सपोर्ट टिमजस्तै व्यवहार गर्ने कम्पनीको भनाइ छ।

मेलिङ्गो एआईले नेपालमा आफ्नो आधिकारिक साझेदारका रूपमा ब्लु ओभल इन्टरनेशनललाई नियुक्त गरेको छ। यस साझेदारीले नेपाली ई–कमर्स, खुद्रा व्यापार, पर्यटन, वित्तीय सेवा, शिक्षा लगायत विभिन्न क्षेत्रका व्यवसायलाई उन्नत एआई प्रविधि, स्थानीय भाषामा कार्यान्वयन सहयोग, तालिम तथा निरन्तर सेवा र समर्थन उपलब्ध गराउनेछ।

ब्लु ओभल इन्टरनेशनलका प्रबन्ध निर्देशक प्रदीप श्रेष्ठले नेपालको डिजिटल रूपान्तरण यात्रामा यो महत्वपूर्ण कदम भएको बताए। “मेलिङ्गो एआईले हाम्रो बजारमा पहिले कहिल्यै उपलब्ध नभएको स्तरको कुराकानी बुद्धिमत्ता ल्याएको छ। अब नेपाली कम्पनीहरूले विश्वस्तरीय व्यक्तिगत ग्राहक अनुभव दिन, बिक्री बढाउन र ग्राहक सन्तुष्टि उकास्न सक्नेछन्,” उनले भने।

मेलिङ्गो एआईका एक वरिष्ठ अधिकारीले ब्लु ओभल इन्टरनेशनलसँगको सहकार्यबाट नेपालमा सेवा विस्तार गर्न पाउँदा उत्साहित रहेको बताए। नेपालको तीव्र गतिमा विस्तार भइरहेको डिजिटल अर्थतन्त्र र ई–कमर्स क्षेत्र एआई एजेन्टहरूका लागि उपयुक्त रहेको उल्लेख गर्दै उनले सयौं नेपाली व्यवसायलाई ग्राहक सन्तुष्टि बढाउन, लागत घटाउन र राजस्व वृद्धि गर्न सहयोग गर्ने लक्ष्य रहेको बताए।

कम्पनीका समाधानहरू अब नेपालमा ब्लु ओभल इन्टरनेशनलमार्फत मात्र उपलब्ध हुनेछन्। आफ्नो व्यवसायका लागि मेलिङ्गो एआई सेल्स एजेन्ट वा सेवा एजेन्ट प्रयोग गर्न इच्छुक कम्पनीहरूले व्यक्तिगत डेमो र परामर्शका लागि ब्लु ओभल इन्टरनेशनलसँग सम्पर्क गर्न सक्ने जनाइएको छ।

मेलिङ्गो एआई कुराकानीमा आधारित कृत्रिम बुद्धिमत्ताको अग्रणी कम्पनी हो, जसका एआई एजेन्टहरूले विश्वभरका व्यवसायहरूलाई ग्राहक संलग्नता, बिक्री तथा ग्राहक हेरचाह बढाउन सहयोग गर्दै आएका छन्। यस्तै, ब्लु ओभल इन्टरनेशनलले विश्वस्तरीय प्रविधिलाई नेपाली बजारअनुकूल बनाउँदै डिजिटल तथा व्यावसायिक समाधान प्रदान गर्दै आएको अग्रगामी कम्पनीका रूपमा परिचित छ।