एजेन्सी । उरुग्वेली स्ट्राईकर लुइस स्वारेज चम्किएपछि साविक विजेता एट्लेटिको म्याड्रिडले स्पेनिस ला लिगामा गेटाफेविरुद्ध पूनरागमन जित निकालेको छ । 

मंगलबार राति भएको खेलमा एट्लेटिकोले गेटाफेलाई उसैको मैदानमा २–१ गोलले हरायो । १० खेलाडीमा समेटिएको गेटाफे सुरुवाती अग्रता लिएर पनि हार खेप्न बाध्य भयो । एट्लेटिकोको जितमा दुवै गोल लुइस स्वारेजले गरे । गेटाफेका स्टेफन मित्रोभिकले सुरुवाती गोल गरेका थिए । 

प्रतिस्पर्धात्मक खेलमा गेटाफेले ४५औं मिनेटमा अग्रता लिएको थियो । स्टेफनले हेड गोल गर्दै घरेलु टोलीको उत्साह जगाए । तर गेटाफेको खुशी लामो समय टिकेन । ७४औं मिनेटमा गेटाफे १० खेलाडीमा समेटियो । कार्लेस एलेना दोहोरो पहेँलो (रातो) कार्ड पाउँदै बाहिरिएपछि गेटाफे दबाबमा देखिएको थियो । जसको फाइदा पाहुना टोली एट्लेटिकोले भरपुर उठायो । 

एट्लेटिकोले ६८औं मिनेटमा बराबरी गोल फर्काएको थियो । स्वारेजले मारियो हर्मोसोको पासमा गोल गर्दै खेललाई बराबरीमा ल्याए । त्यसपछि इन्जुरी समयमा स्वारेजले ब्यक्तिगत दोस्रो गोल गर्दै टोलीलाई महत्वपूर्ण जित दिलाए । स्वारेजले सिम भर्सलज्कोको पासमा हेड गोल गरेका थिए ।  

जितसँगै एट्लेटिकोले लिगमा अपराजित यात्रा पनि कायम राखेको छ । शीर्षस्थानमा उक्लिएको एट्लेटिकोको ६ खेलबाट १४ अंक छ । अंकबिहिन गेटाफे १९औं स्थानमा छ । दोस्रो स्थानमा रहेको रियल म्याड्रिडले पाँच खेलबाट १३ अंक बनाएको छ । तेस्रो र चौथो स्थानमा रहेको भ्यालेन्सिया र रायो भालेकानोको समान १० अंक छ । 

मंगलबार राति नै भएको अर्को खेलमा रायो भालेकानोले एथलेटिक बिल्बाओलाई उसैको मैदानमा २–१ गोलले हराउँदै चौथो स्थानमा उक्लिएको हो । रायो भालेकानोको जितमा अल्भारो गार्सियाले पाँचौं र राडामेल फाल्काओले दोस्रो हाफको इन्जुरी समयमा गोल गरे । बिल्बाओले आत्मघाती गोल उपहार पाएको थियो । पराजित बिल्बाओ ९ अंक सहित छैटौं स्थानमा छ । अर्को खेलमा सेल्टा भिगोले लिभान्तेलाई २–० गोलले पराजित गरेको छ ।