काठमाडौं । चितवन टाइगर्सले चौंथो संस्करणको एभरेष्ट प्रिमियर लिग (इपीएल) टी–२० क्रिकेटमा विजयी सुरुवात गरेको छ । टियु क्रिकेट मैदानमा आइतबार भएको खेलमा चितवनले विराटनगर वारिवर्सलाई दुई विकेटले हरायो । 

विराटनगरले दिएको एक सय ५२ रनको लक्ष्य चितवनले २० ओभरमा आठ विकेटको क्षतिमा पूरुा गरेको थियो । चितवनको जितमा राजेश पुलामीले अविजित ४३ रन बनाए । 

भिम सार्कीले ३०, दिलिप नाथले २३, करिम जनत १९ र इशान पाण्डे १० रन बनाए । कप्तान सोमपाल कामी नौ रन जोडे । 
बलिङमा विराटनगरका सिकन्दर राजा र करण केसीले दुई दुई विकेट लिए । प्रतिस जिसी, अनिल खरेल र रायन पठानले एक एक विकेट झारे । 

यसअघि टस हारेर पहिले ब्याटिङ गरेको विराटनगरले २० ओभरमा ९ विकेटको क्षतिमा एक सय ५१ रन बनायो । खराब सुरुवात गरेको विराटनगरका लागि सिकन्दर राजाले ६७ रनको अर्धशतकीय इनिङ्स खेलेका थिए । 

उनले ४७ बलमा ७ छक्का र दुई चौका प्रहार गरे । अनिल शाहले ३२ रन, सौरभ खनालले अविजित ३० रन बनाए । बिक्रम भुसालले ७ रन बनाए । अन्य ब्याट्सम्यानले दोहोरो संख्यामा रन बनाउन सकेनन् । 

बलिङमा चितवनका लागि कप्तान सोमपाल कामी, कमल ऐरी, करिम जनत र सागर ढकालले दुई दुई विकेट लिए ।