एजेन्सी । इङ्लिस प्रिमियर लिग फुटबलमा टोट्टनहामलाई आर्सनलको नमिठो झट्का लागेको छ । आइतबार राति भएको खेलमा टोट्टनहाम आर्सनलसँग ३–१ गोलले पराजित भयो । 

घरेलु मैदानमा आर्सनललाई जिताउन इमिल स्मिथ रोवी, पिर्रे इमरिक औवामियाङ र बुकायो साकाले गोल गरे । टोट्टनहामका ह्युङ मिन सनले सान्त्वना गोल फर्काएका थिए । आर्सनलले १२औं मिनेटमा खाता खोलेको थियो । २७औं मिनेटमा कप्तान पिर्रे इमिरिक औवामियाङले गोल गर्दै आर्सनलको अग्रता दोब्बर पारे । ३४औं मिनेटमा बुकायो साकाले गोल गरेपछि आर्सनलले पहिलो हाफमै ३–० ले अगाडी बढ्यो । 

टोट्टनहामका सनले ७९औं मिनेटमा गोल गर्दै टोलीलाई खेलमा फर्काउने प्रयास गरे । आर्सनलले पहिलो हाफकै गोलले सहज जित निकाल्यो । खेलभर आर्सनलको दबाब झेलेको टोट्टनहामको लिगमा यो लगातार तेस्रो हार हो । जितसँगै ६ खेलबाट नौ अंक बनाएको आर्सनल १०औं स्थानमा छ । नौ नै अंक बनाएको टोट्टनहाम ११औं स्थानमा छ । 

अर्काे खेलमा वल्भ्सले साउथह्याम्टनलाई उसकै मैदानमा १–० गोलले हरायो । वल्भ्सको जितमा राहुल जिमिनेजले ६१औं मिनेटमा निर्णायक गोल गरेका थिए । जितसँगै ६ अंक बनाएको वल्भ्स १४औं स्थानमा छ । चार अंक बनाएको साउथह्याम्टन १६औं स्थानमा छ ।