काठमाडौं । काठमाडौं महानगरपालिकाको मेयर बने लगत्तै एक्सनमा उत्रिएका बालेन शाह उपमेयर सुनिता डंगोललाई लिएर शुक्राबार बिहानै काठमाडौँको फोहोर बोकेको स्थान सिसडोल पुगेका छन् ।

मेयर शाह र उपमेयर डंगोल फोहोर व्यवस्थापनसँगै स्थानीय सरोकारका विषयमा छलफल गर्न भन्दै बिहानै सिसडोल पुगेका हुन् । सिसडोल जानु अघि मेयर उपमेयरले बिहिवार साँझ सहरी विकासमन्त्री रामकुमारी झाँक्रीसँग भेटवार्ता गरेका थिए । सो पश्चात सिसडोलवासीका समस्या र पूर्वाधार विकासबारे अध्ययन गर्न सिसडोल पुगेका हुन्

डम्पिङ साइटका कारण निकै समस्या झेलेका सिसडोलबासीसंगको छलफलमा स्थानीयको समस्या र गुनासा सुनेपछि मेयर साह र उपमेयर डंगोलले तत्कालको लागि केमिकल राखेर गन्ध हटाउने उपाय अपनाउने बताएका छन् ।

केमिकल हालिसकेपछि गन्ध हराउन एक हप्ता लाग्ने भन्दै उनीहरुले भने, ‘एक हप्तामा गन्ध नआउने बनाउछौं ’ तर केमिकल बोकेर आउने ट्रकलाई नरोक्न उनीहरुले सिसडोलबासीलाई आग्रह गरे। फोहोरबाट मल बनाउने अर्को एउटा सिस्टम राख्ने र ड्रिल गरेर ग्यास निकाल्ने योजना पनि मेयर बालेनले सिसडोलबासीलाई सुनाए । यी सबै काम गर्न तीन–चार महिना लाग्नसक्ने उनीहरुको भनाई छ।

मेयर बालेनले सड्ने र नसड्ने फोहोर छुट्टयाएर विसर्जन गर्ने व्यवस्था मिलाउने र त्यसका लागि जनचेतना जगाउने बताए । ‘मान्छेले पाँच मिनेट फोहोर नछुट्टाइदिएर मान्छे मरिरहेको छ भन्ने कुरा त फिल हुनुपर्‍यो नि त,’ उनले भने ।

उता स्थानीयले भने आफूहरुले स्वस्थ्य वातावरणमा बस्न पाउनुपर्‍यो भनेर माग गर्दा स्थानीय जनप्रतिनिधि र नागरिक अगुवाले प्रहरी प्रशासन लगाएर दमन गरेको गुनासो गरेका थिए ।

मानव र फोहोर एकै ठाउँमा बस्न नसक्ने भएकाले फोहोर वा स्थानीयको उचित व्यवस्थापन हुनुपर्ने माग उनीहरुले राखेका थिए । त्यसको दीर्घकालीन समाधान गर्ने उपायको खोजी गर्ने प्रतिवद्धता जाहेर गरेर मेयर उपमेयर काठमाडौं फर्किएका छन् ।