काठमाडौं । पोखरा महानगरपालिकामा नेकपा एमालेले बजेट पुस्तिका च्यातेपछि नगरसभा अवरुद्ध भएको छ । नगरसभाबाट बजेट पारित हुनुअगाडि नै बजेटको रातो कितावमा प्रकाशन गरिएको भन्दै एमालेबाट निर्वाचित जनप्रतिनिधिहरुले बिरोध जनाएसँगै नगरसभा अवरुद्ध भएको हो ।

एमाले जनप्रतिनिधिहरुले बिरोध जनाएसँगै बजेट प्रश्स्तुतसमेत प्रभावित भएको छ । साढे ४ बजे शुरु भएको नगरसभामा एमालेबाट निर्वाचित प्रतिनिधि राधिका शाहीले रातो किताव च्यात्दै बजेट पारित हुनुभन्दा अगाडि रातो किताव छापेको भन्दै आपत्ति जनाइन् । उनले १७६ जना नगरपालिका सदस्यको अधिकार हनन् गरी लोकतान्त्रिक विधि, विधानलाई कुल्चँदै र नगरसभा सदस्यको अधिकारलाई कुल्चँदै बजेट प्रश्तुत भन्दा अगाडि नै रातो किताव छापेकाले एमाले बजेटमा सहभागी नहुने बताइन् ।

त्यस्तै, महानगरकी उपमेयर मञ्जुदेवी गुरुङले रातो किताव किन प्रकाशन गरियो भन्ने विषयमा आफू अनविज्ञ रहेको बताइन्् । उनले रातो किताव किन भनियो र किन छापियो मेयरले त्यसको जवाफ दिनुपर्ने बताइन् ।

त्यस्तै, महानगरका मेयर धनराज आचार्यले किताव मस्यौदामात्र भएको र बजेटको अन्तिम रातो किताव नभएको भन्दै सभामा जवाफ दिए । उनले महानगरको नम्बर नघटोस् भनेर ‘लिजा’ (स्थानीय तह स्वमूल्यांकन प्रणाली)मा चढाउनका लागि लेखा शाखाले नियमित कामका क्रममा बजेट ड्राफ्ट तयार मात्रै गरेको बताए ।