काठमाडौं । राष्ट्रिय योजना आयोगका उपाध्यक्ष डा. विश्वनाथ पौडेलले जलविद्युत उत्पादनको लागत कम गर्ने भन्दापनि प्रतिष्पर्धी बनाउनुपर्ने बताए । उनले विद्युत प्रशारण लाइन सरकार वा निजी क्षेत्र जसले बनाए पनि कम लागतमा बनाउने अवस्था सिर्जना गर्न आयोग तयार रहेको बताए ।

उनले भने,‘ जलविद्युत क्षेत्रको लागत कसरी घटाउने भन्दा विद्युत क्षेत्रलाई प्रतिष्पर्धामा लैजाऔं । प्रशारण लाइन सरकार वा निजी क्षेत्रले जसले बनाए पनि कम लागतमा बनाउने अवस्था सिर्जना गरौं र उसले जसरी हाइवयमा निजी र सरकारी सवारी चल्छ त्यसरी नै विद्युत चल्न दिऔं । मार्केट कसैले खोज्छ भने खोज्न दिऔं । बचेर उसले पैसा कमाओस् । त्यो विषयमा म सहमत छु । त्यसमा हामीले गर्नुपर्ने काम केके हो हामीले गरौँला । हामीले अनाश्यक रुपमा विद्युतलाई देशमा बेच्ने की विदेशमा भन्ने कुरा बढी गछौं । मलाई लाग्दैन कसैको असहमति छ । पाउन्जेलसम्म देशभित्र नै खपत गर्ने हो । नेपालमा नेपालीलाई विद्युत बाल्न नदिऔं विदेशमा नै बेचौं भनेर कसैले भनेको छैन । यो विषय धेरै वहस गर्न जरुरी छैन ।’

उपाध्यक्ष पौडेलले नेपालको विद्युत व्यापारको विषयमा धेरै वहस गर्न आवश्यक नभएको बताए । उनले नेपालमा उत्पादित विद्युत सकेसम्म नेपालमा नै खपत गर्न सक्नुपर्ने बताए ।