काभ्रे । नेकपा एमाले काभ्रेले चुनावी प्रशिक्षण शुरु गरेको छ । जिल्ला स्तरीय अगुवा कार्यकर्ताहरुका लागि आगामी मसिंर ४ गते हुने प्रतिनिधि सभा र प्रदेश सभा निर्वाचनको तयारीका लागि प्रशिक्षण आयोजना गरिएको एमाले काभ्रेले जानकारी दिएको छ ।

एमाले सचिव योगेश भट्टराईले गठबन्धनका कारण मुलुकमा अस्थिरता र संकट उत्पन्न भएको बताउँदै आगामी निर्वाचनबाट गठबन्धनलाई परास्त गरी मुलुकको समृद्धीको यात्रालाई निरन्तरता दिनु पर्ने बताए । ‘गठवन्धन नेतृत्वको सरकार र दलहरु मुलुकमा अस्थिरता निम्त्याउँदै सदभाव भड्काउन खोजिरहेका छन्’–सचिव योगेश भट्टराईले भने–‘एमाले जातीय तथा क्षेत्रिय र सामाजिक सद्भाव कायम राख्न निरन्तर सक्रिय छ ।’

नेपालमा सद्भाव भड्काउन गठवन्धनको बलमा विदेशी शक्तिहरु समेत सक्रिय भएको भट्टराईले बताउनु भयो । ‘शेरबहादुर देउवा नेतृत्वको सरकार अमेरिका र चीनको लडाईमा नेपालको भूमि मैदान बनाउन दिंदैछ ’–सचिव भट्टराईले भने–‘असंलग्न राष्ट्रको सिद्धान्त विर्सेर नेपाललाई लडाईको केन्द्र बनाउने गठवन्धन सरकारको योजना नेपाली जनताले आगामी मसिंरको निर्वाचनबाट परास्त गर्नु पर्छ ।’