काठमाडौं । गैर आवासीय नेपाली संघले नेपालको पर्यटक भित्र्याउनको लागि पर्यटन क्षेत्रको प्रचार डिजिटल माध्यमबाट विभिन्न देशको भाषामा बनाउन आग्रह गरेको छ । सोमवार काठमाडौंमा नेपालको पर्यटन क्षेत्रको विकासमा गैर आवासिय नेपाली संघको भुमिका विषय अन्तरक्रिया कार्यक्रम गर्दै संघले नेपाल टुरिजम बोर्डलाई यस्तो आग्रह गरेको हो ।

संघले अबको युग डिजिटल युग भएकाले नेपालको पर्यटन क्षेत्रको प्रचार पुरानो शैलीमा नभएर नेपालको समग्र पर्यटन क्षेत्रको जानकारी दिनेगरी छोटो भिडियो बनाएर प्रचार गर्नुपर्ने आवश्यकता रहेको बताएको छ ।

कार्यक्रममा बोल्दै गैर आवासिय नेपाली संघका प्रवक्ता सोम सापकोटाले नेपालको पर्यटन क्षेत्रको प्रचार अब डिजिटल माध्यमबाट गर्नुपर्ने बताए । उनले नेपालको पर्यटन क्षेत्रको प्रचार भिडियो बाहिर देशको भाषामा नै बनाएर प्रचार गर्दा प्रभावकारी हुने बताउँदै त्यसको लागि संघ बोर्डसँग सहकार्य गर्न तयार रहेको बताए ।

सापकोटाले गैर आवसीय नेपालीहरु नेपालमा आउँदा नेपाली एयरलाइन्सहरु र होटलहरुमा नेपालीहरु सहरको भाडा कायम गर्न माग गरे । उनले नेपालमा होटल तथा अन्य पर्यटन क्षेत्रमा लगानी गर्ने सहज वातावरण भए लगानी गर्न तयार रहेको जानकारी दिए ।

त्यस्तै कार्यक्रममा होटल एशोसिएशन नेपालका उपाध्यक्ष विनायक साहले पछिल्लो समय नेपाली पर्यटन क्षेत्र बिस्तारै लयमा आउन लागेको बताए । उनले नेपाली पर्यटन व्यवसायीहरुको अनुभव र क्षमता देखाउने समय आएको जानकारी दिए । उपाध्यक्ष शाहले गैर आवासिय नेपाली संघले नेपाल हरेक कुराले नरमल भएको प्रचार गर्नुपर्ने बताए ।

त्यस्तै, नेपाल पर्यटन तथा होटल व्यवस्थापन प्रतिष्ठानका कार्यकारी निर्देशक राजेश उप्रेतीले प्रतिष्ठानले नेपाली खाना खाएर नेपालमा नै होटल व्यवस्थापन पढाउने योजनाका साथ सातै प्रदेशमा शाखा बिस्तार गर्ने भौतिकपूर्वाधार बनाउन सहयोगको माग गरे । उनले प्रतिष्ठानलाई सरकार तथा अन्य कतैबाट सहयोग नभएको गुनासो गरे ।

कार्यकारी निर्देशक उप्रेतीले प्रतिष्ठानमा पढ्ने विद्यार्थीहरुलाई इन्टर्नको लागि आफ्नै मन्त्रालय अन्तर्गतको नेपाल वायुसेवा निगममा राखिदिन बारम्बार आग्रह गर्दा समेत नराखिएको गुनासो गरे ।