ललितपुर– नेकपा एमालेका अध्यक्ष केपी शर्मा ओलीले ललितपुर क्षेत्र नम्बर २ (१)बाट निर्वाचित सांसद रामेश्वर श्रेष्ठलाई निवासमै बोलाएर बधाई तथा शुभकामना दिएका छन् ।

अध्यक्ष ओलीले बालकोटस्थित निवासमा बोलाएर श्रेष्ठलाई सफल कार्यकालको शुभकामना दिएका हुन् । ‘ललितपुर क्षेत्र नम्बर २ मा तपाईंहरुले राम्रो नतिजा ल्याउनुभएको छ,’ अध्यक्ष ओलीले श्रेष्ठलाई भने, ‘अब असल जनप्रतिनिधि भएर सेवा गर्नुहोला ।’

अध्यक्ष ओलीले नगर प्रमुखको जस्तो कार्यकारी अधिकार नभए पनि नीति निर्माण र जनताका आवाज संसदमा उठाउन प्रेरित गरे । श्रेष्ठ महालक्ष्मी नगरपालिकाका पूर्वनगर प्रमुख हुन् । श्रेष्ठको बिरासत जोगाउँदै एमालेले दोस्रो कार्यकाल पनि नगरपालिकामा विजय हासिल गरेको छ ।

श्रेष्ठ नगर प्रमुख भएपछिको पहिलो नगर सभाको उदघाटन अध्यक्ष ओलीले नै गरेका थिए ।

श्रेष्ठ नगर प्रमुख हुँदा सुशासन र पारदर्शिताका क्षेत्रसँगै सेवा र विकासमा राम्रो काम गरेको अध्यक्ष ओलीको भनाइ थियो ।

श्रेष्ठले प्रदेश सभा सदस्यमा उम्मेदवार दिने अवसर दिएकोमा पार्टी अध्यक्षलाई धन्यवाद दिए । उनले आफ्नो पदीय जिम्मेवारी इमान्दारिताका साथ पूरा गर्ने विश्वास दिलाए ।

श्रेष्ठले प्रदेशमा नेकपा एमालेको तर्फबाट पहिलो खाता खोलेका थिए । राप्रपाका धनराम केसीलाई १४४७ मतले हराउँदै उनी बागमती प्रदेश सभा सदस्य निर्वाचित भएका थिए । उनी ८ हजार २९८ मतका साथ विजयी भए भए भने राप्रपाका केसी ६ हजार ८५१ मतका साथ पराजित भए । गठबन्धनका तर्फबाट कांग्रेस उम्मेदवार रिसा श्रेष्ठ तेस्रो भइन् ।

श्रेष्ठले दिए मतदातालाई धन्यवाद

यसैबीच ललितपुर क्षेत्र नम्बर २ (१) बाट प्रदेश सभा सदस्यमा निर्वाचित भएपछि श्रेष्ठले मतदातालाई धन्यवाद दिएका छन् ।

श्रेष्ठले एक अपिल जारी गर्दै मतदाताले विश्वासका साथ विकास, समृद्धि र जनताको सेवा गर्ने जिम्मेवारी दिएकोमा धन्यवाद दिएका छन् । उनले निर्वाचित भएपछि कुनै दल वा क्षेत्रका आधारमा फरक व्यवहार नगर्ने प्रतिबद्धता जाहेर गरेका छन् । ‘मसँगै प्रतिस्पर्धामा रहनुभएका साथीहरुले प्राप्त गर्नुभएको मतको कदर गर्नु मेरो कर्तव्य हुनेछ,’ अपिलमा भनिएको छ, ‘अतः प्रतिस्पर्धामा रहनुभएका उम्मेदवार साथीहरु, समर्थक र शुभचिन्तकहरुलाई पनि विकास र समृद्धिका लागि हातेमालो गरेर अगाडि बढ्न अपिल गर्दछु ।’

श्रेष्ठले आफ्नो विजय पाँच वर्ष नगर प्रमुख हुँदा इमान्दारितापूर्वक काम गरेको मूल्यांकनको रुपमा लिएको बताएका छन् । ‘बाँकी दिनहरुमा पनि जनताको मतलाई दुरुपयोग गर्ने, निजी स्वार्थमा प्रयोग गर्ने छैन भन्ने विश्वास दिलाउन चाहन्छु । मलाई मतदान गर्नुहुने मतदाताहरुको शीर उँचो बनाउने गरी काम गर्नेछु,’ उनले भनेका छन् ।

श्रेष्ठ शुभेच्छुक, समर्थकहरुलाई संयम र शालिनतासहित विजययात्रा गर्न र कुनै दल वा प्रतिस्पर्धीहरुको आत्मसम्मानमा चोट नपुर्‍याउन अपिल गरेका छन् ।

नवनिर्वाचित प्रदेश सांसद श्रेष्ठले निर्वाचनलाई सफल बनाउनुहुने निर्वाचन आयोग, सुरक्षाकर्मी, राष्ट्रसेवक कर्मचारी, पार्टी पंति, शुभेच्छुक, समर्थक, विभिन्न संघ संस्था र सञ्चारकर्मीप्रति धन्यवाद व्यक्त गरेका छन् ।