काठमाडौं । उपप्रधान एवं भौतिक पूर्वाधार तथा यातायातमन्त्री नारायणकाजी श्रेष्ठले विकास निर्माणका काममा सरकार तमासा हेरेर नबस्ने बताएका छन् । शुक्रवार ललितपुरको भैंसेपाटी सडकखण्डको अवलोकन गर्न पुग्नुभएका उनले यस्तो बताएका हुन् ।

उनले विकास निर्माणका लागि नेपाल विद्युत प्राधिकरण, खानेपानी, मेलम्ची आयोजना, दूरसञ्चार र सडक विभाग सबै मिलेर काम गर्नुपर्ने आवश्यक्ता रहेको बताए । उनले समन्वयको कमी र आफ्नो जिम्मेवारी बोध गर्न नसक्दा यसअघि विकास निर्माणको क्षेत्रमा देशले आवश्यक काम गर्न नसकेको भन्दै अब पनि सरकारले विकास निर्माणमा तमासा हेरेर नबस्ने बताए । उनले आफ्नो पहिलो प्राथमिकता नागरिकलाई भयरहीत सडकमा यात्रा गराउने रहेको र त्यसका लागि आफूले काम शुरु गरिसकेको बताए । मन्त्री श्रेष्ठले सडकका समस्या समाधानका लागि प्रत्येक महिनाको दोस्रो हप्ताको शुक्रवार सम्बन्धित निकायहरुका प्रमुखहरुसँग छलफल गर्ने र समस्याको पहिचान गरी समाधान गर्नका लागि पहल गर्ने अभियानमा आफू लागेको बताए ।

उनले सडकका समस्या समाधानका लागि अझै केही समय लाग्ने भएपनि जनतालाई सेवा दिने कुरामा कतैबाट हेलचेक्र्याँइ र कमजोरी भएको छ खण्डमा सरकारले छुट नदिने बताए । उनले सरकारले बनाएका नीति नियमको प्रभावकारी कार्यान्वयन गर्न लाग्ने र सकारात्मक गुणात्मक हस्तक्षेप हुने बताए । सबैलाई जिम्मेवारी बोध गराएर समन्वयात्मक ढंगले काम गर्नेपनि बताए । उनले गैर जिम्मेवारी काम गर्नेहरुलाई कारबाहीको प्रक्रियामा जान सरकार नहिच्किचाउने बताए ।

उनले भने, ‘सबै निकायहरु जस्तो नेपाल विद्युत प्राधिकरण, खानेपानी, मेलम्ची आयोजना, दूरसञ्चार र सडक विभाग सबै मिलेर काम गर्नुपर्ने आवश्यक्ता छ । समन्वय र सबैले आफ्नो जिम्मेवारी समयमा नै पूरा नगरेको कारण समस्या देखापरेको छ । काठमाडौं उपत्यकाका सडकहरु मन्त्रालय अन्तर्गतका मात्रै छैनन्, महानगरका पनि कतिपय सडक छन्, उच्चस्तरीय वागमती सभ्यता अन्तर्गतका छन । सबैसँग समन्वय गरेर सडकका समस्या समाधान गर्ने, सडक चुस्तदुरुस्त बनाउने र यस प्रकारको पैदलयात्री हिँड्ने बाटो पनि ठिक ढंगले अघि बढाउने योजनामा काम गर्न खोजिरहेका छौँ ।

प्रत्येक महिनाको दोस्रो हप्ताको शुक्रवार २ बजे सबै सम्बन्धित निकायका प्रमुखहरु नै बसेर समस्याका समाधानका लागि छलफल गर्ने निर्णय भएको छ । केही समय अझै लाग्छ । राज्यका निकायहरु जनताले तिरेको करबाट हामीले सेवा,सुविधा लिइरहेका छौँ । कतैबाट हेलचेक्र्याँइ र कमजोरी भएको छ भने छुट दिनेछैनौँ । प्रभावकारी ढंगले कार्यान्वयन गरिन्छ । सकारात्मक गुणात्मक हस्तक्षेप हुन्छन् । तमासा हेरेर बस्ने स्थिति छैन । अफ्ठ्यारो छ, जनताले दुःख पाएका छन्, विकास निर्माणको अनुभुति गर्न पाएका छैनन् । तर पनि यस्तै हो भन्ने हुँदैन, सकारात्मक गुणात्मक हस्तक्षेप गरिन्छ, सबैलाई जिम्मेवारी बोध गराएर समन्वयात्मक ढंगले काम हुन्छ । गैर जिम्मेवारी काम गर्नेहरुलाई कारबाहीको प्रक्रियामा हामी जान्छौँ ।’

उपप्रधानमन्त्री श्रेष्ठले सकारात्मक सुधार गर्ने किसिमबाट काम गर्न सम्बन्धित निकायहरुलाई निर्देशन दिइसकेको बताए । उनले निर्माण व्यवसायीसँग तोकिएको समयभित्र काम सक्नैपर्ने लिखित प्रतिवद्धता भएको पनि बताए ।