काठमाडौं– नेकपा (एमाले)ले प्रतिस्पर्धा गरेका पदहरुमामात्रै उम्मेदवारी दिएको भन्दै राजनीतिक क्षेत्रमा नेपाली कांग्रेसको आलोचना भइरहेको छ ।

सभामुख, प्रदेशका मुख्यमन्त्री, प्रदेश सभामुख, उपसभामुख पदमा कांग्रेसले एमालेलाई असहयोग गरेको छ भने गठबन्धनका दलहरु माओवादी केन्द्र र जनता समाजवादीले प्रतिस्पर्धा गरेका ठाउँमा सहयोग गरेको छ ।

भावी राष्ट्रपतिलाई केन्द्रमा राखेर कांग्रेसले गठबन्धनका दलहरुप्रति फरक नीति लिएको भन्दै एमाले पोलिटब्यूरो सदस्य एवं प्रतिनिधि सभा सदस्य सूर्य थापाले आपत्ति जनाएका छन् ।

प्रधानमन्त्री, सभामुख, उपसभामुखको मत केलाउँदै थापले निष्कर्षमा भनेका छन् । ‘अझै किन नजर राष्ट्रपतिमा केन्द्रित भएको छ ? राष्ट्रिय सहमति कुनै पद हत्याउने अस्त्र हो र ? एक महिनामै काङ्ग्रेसमा देखिएको यतिधेरै उतारचढावले कस्तो तस्बिर देखिएको छ नि ?,’ उनको प्रश्न छ, ‘बीपी, गणेशमान, कृष्णप्रसाद र गिरिजाप्रसादले यस्तो चालामाला देखेको भए के भन्नुहुन्थ्यो होला श्र काशी जाने रसुवागढीको बाटो !’

थापाले फेसबुकमा यस्तो लेखेका छन्–

एक महिनामै यति धेरै उतारचढाव ?

१) पुष्पकमल दाहाल ‘प्रचण्ड’ १६९ मतका साथ पुस १०गते प्रधानमन्त्री नियुक्त हुनुभयो ।

२) उहाँले पुस २६ गते २६८ मत प्राप्त गरि विश्वासको मत प्राप्त गर्नुभयो, विपक्षमा २ मत रह्यो ।

३) देवराज घिमिरे १६७ मत प्राप्त गरी माघ ५ गते सभामुखमा विजयी हुनुभयो। उहाँको विपक्षमा १०० मत रह्यो ।

४) इन्दिरा राना १६६ मत प्राप्त गरी माघ ७ गते विजयी हुनुभयो, उहाँको विपक्षमा ९७ मत रह्यो ।

यसरी १, ३ र ४ नम्बरमा प्राप्त मत स्वभाविक छ, २ र ३ मतको अन्तर हुनु सामान्य र स्वभाविक हो। तर नम्बर २ मा थपिएको मतमा कैफियत रहेको स्पष्ट छ र अस्वभाविक पनि भएको छ। त्यसमा इमान हुन्थ्यो भने त्यसपछि सभामुख र उपसभामुखको निर्वाचनमा किन निरन्तर भएन ?

कांग्रेस नेतृत्वको गठबन्धनमा १०० र ९७ मत मात्रै बाँकी रहेको तथ्य पटकपटक स्पष्ट भइसकेका छन्। अब अझै खेल्न खोजेर कहाँ पुग्ने हो र ?

अझै किन नजर राष्ट्रपतिमा केन्द्रित भएको छ ? राष्ट्रिय सहमति कुनै पद हत्याउने अस्त्र हो र ? एक महिनामै कांग्रेसमा देखिएको यतिधेरै उतारचढावले कस्तो तस्बिर देखिएको छ नि ? बीपी, गणेशमान, कृष्णप्रसाद र गिरिजाप्रसादले यस्तो चालामाला देखेको भए के भन्नुहुन्थ्यो होला ?

काशी जाने रसुवागढीको बाटो !