काठमाडौं । प्रधानमन्त्रीको अभिव्यक्तिलाई लिएर संसदको प्रमुख प्रतिपक्षी नेकपा एमालेले आज (बिहीबार) पनि राष्ट्रियसभाको बैठक अवरुद्ध पारेको छ। दिउँसो १ बजे बैठक सुरुमै एमाले सांसदहरु आफ्नो सिटबाट उठेर विरोध जनाएका थिए ।

बैठकको सुरुमै समय लिएर बोल्दै एमाले सांसद भैरवसुन्दर श्रेष्ठले प्रधानमन्त्रीले मुलुकको सार्वभौमिकता र स्वाधीनताविरुद्ध अभिव्यक्ति दिएकाले राजीनामा नदिएसम्म सदन सञ्चान हुन नदिने बताए ।

केही दिनअघि प्रधानमन्त्री प्रचण्डले भारतीय नागरिक प्रितम सिंहको पुस्तक विमोचन कार्यक्रममा प्रितम सिंह आफूलाई प्रधानमन्त्री बनाउन पटक पटक दिल्ली गएको भनी गैरजिम्मेवार अभिव्यक्ति दिएको एमालेको आरोप छ ।

प्रधानमन्त्रीको अभिव्यक्तिलाई लिएर एमालेले बुधबार पनि संघीय संसदका दुवै सदन प्रतिनिधिसभा र राष्ट्रियसभाको बैठक अवरुद्ध गरेको थियो ।

एमाले नेता श्रेष्ठले प्रचण्डले प्रधानमन्त्री बन्न भारतको निर्देशन चाहिन्छ, भारतको सल्लाह सुझाव चाहिन्छ भन्ने आशयको अभिव्यक्ति दिएकाले उनी सो पदमा बस्न योग्य नभएको आरोप लगाए ।

‘आज सामाजिक सञ्जालमा सदनले बनाउने भनेको प्रधानमन्त्री दिल्लीको आदेश र निर्देशनमा बन्दो रहेछ भन्ने चर्चा भएको छ । यसले हामी नेपालीको शीर निहुरेको छ ।’ एमाले सांसद श्रेष्ठले भने ।