एजेन्सी । भारतीय प्रधानमन्त्री नरेन्द्र मोदीले चन्द्रमामा ल्यान्डर अवतरण गरेको ठाउँलाई ‘शिव शक्ति’ पोइन्ट भनिने बताएका छन् ।

मोदीले सो कुरा शनिवार बिहान बेंगलुरुमा रहेको इसरोको नेटवर्क कमाण्ड सेन्टर पुगेर यहाँका वैज्ञानिकहरूसँग भेटघाटका क्रममा भनेका हुन् ।

मोदीले सो कुराकानीमा भने, ‘चन्द्रमाको त्यो भाग जसमा हाम्रो चन्द्रयान अवतरण भएको छ । चन्द्रयान– ३ को चन्द्रमा अवतरण गर्ने ठाउँ अब शिव शक्तिको नामले चिनिनेछ ।’

मोदीले थपे, ‘एकातिर विक्रमको विश्वास छ, अर्कोतिर प्रज्ञानको बहादुरी छ । हाम्रो प्रज्ञानले निरन्तर चन्द्रमामा आफ्नो पाइलाको छाप छोडिरहेको छ । विभिन्न क्यामेराबाट खिचिएका तस्बिरहरू अचम्मका छन् । पृथ्वीको करोडौँ वर्षको इतिहासमा पहिलो पटक मानिसले आफ्नो आँखाले त्यो ठाउँको तस्बिर देखिरहेका छन् । यो तस्बिर विश्वलाई देखाउने काम भारतले गरेको छ ।’

अगस्ट २३ मा भारतले चन्द्रयानलाई सफलतापूर्वक चन्द्रमामा अवतरण गरेको थियो र भारतको रोभर प्रज्ञानले चन्द्रमामा आफ्नो गतिविधि सुरु गरेको छ ।

बैंगलोरमा रहेको इसरोको केन्द्रमा प्रधानमन्त्री मोदीले वैज्ञानिकहरूबाट प्रज्ञान रोभरको जानकारी समेत लिएका छन् ।

सो अवसरमा इसरोका वैज्ञानिकहरूले मोदीलाई चन्द्रयानको मोडल पनि प्रस्तुत गरेका छन् ।

वैज्ञानिकहरूलाई सम्बोधन गर्दै मोदीले भने, ‘म दक्षिण अफ्रिकामा थिएँ, त्यसपछि ग्रिस गएँ, तर मेरो दिमाग पूर्ण रूपमा तपाईंहरूमा केन्द्रित थियो । कहिले काहीँ लाग्छ म तपाईंहरुलाई अन्याय गर्छु । मेरो अधैर्य र तपाईंहरुको समस्या । तपाईंहरु यति बिहानै आउनुपर्‍यो तर तपाईंहरुलाई कहिले भेटौँ र नमन गरौँ जस्तो लागिरहेको थियो ।’

मोदीले भावुक हुँदै भने, ‘म भारत आउने बित्तिकै छिटोभन्दा छिटो तपाईंहरुको दर्शन गर्न चाहन्थेँ । तपाईंहरु सबैलाई स्यालुट गर्न चाहन्थेँ ।’