सनत हमाल, मुगु । नेपालकै उत्कृष्ट पर्यटकिय गन्तव्य रारा तालमा विभिन्न प्रजातीका साईबेरियन चरा पुगेका छन् । उत्कृष्ट पर्यटन गन्तव्यका रुपमा रहेको रारा मान्छे पर्यटकका लागि मात्रै आर्कषणको केन्द्र नभई रारा ताल चरा पर्यटकहरुका लागि पनि आर्कषण गन्तव्य बनेको छ ।

रारा तालमा हरेक हिउँदको महिनामा सयौको संख्यामा साईबेरियन चरा राराताल पुग्ने गरेका छन् । अत्याधिक चिसोका कारण साईबेरियाबाट चिसो छल्न विभिन्न प्रजातीका साईबेरियन चराहरु रारा पुगेका छन्। रारा तालमा पुगेको चराको रारा राष्ट्यि निकुञ्जले गणना गर्ने गरेको छ । विभिन्न रंग बदलेर पर्यटकलाई मनमोहक पार्ने राराको सुन्दरतामा साईबेरियन चराको आगमन पनि पर्यटकका लागि थप आनन्द लिने माध्यम बनेको छ।

रारा राष्ट्रिय निकुञ्ज कार्यलय को स्टाफ र नेपाल सेनाको संयुक्त सहकार्यमा २४ सदस्य टोली चार वटा ग्रुपमा विभाजन भई विभिन्न प्रवासी चराहरुको गणना गरियको थियो। गणना गर्दा ३९२ वटा विभिन्न प्रजातीका चरा आएका छन् । चराहरुले पर्यटकको भ्रमण अवलोकनलाई थप आनन्दीत बनाएको छ । यतिबेला रारा ताल घुम्न आउने पर्यटकले राराको सुन्दरतासंगै साईबेरियन चराको समेत अवलोकन गर्न पाउँछन् ।

गणनाको विवरण अनुसार मरुल १७८ वटा,कालीजुरे हाँस ८१ वटा,हरियो टाउके हाँस १ वटा,खोया हाँस ३ वटा,सुनजुरे हाँस ११७ वटा र सिउरे डुबुल्की चरा १२ वटा गरी जम्मा ३ सय ९२ वटा साईबेरियन चरा रारातालमा पुगेको गणनाबाट पत्ता लागेको रारा राष्ट्यि निकुञ्ज कार्यालयका संरक्षण अधिकृत राजु घिमिरेले बताए ।

उनका अनुसार रारा ताल दिउँदको समयमा पर्यटक संगै चराहरुको लागि निकै उत्कृष्ट गन्तव्य बनेको छ । साईबेरियामा नेपालका हिमाली जिल्ला भन्दा अत्यधिक चिसो हुने भएपछि प्राय हिउँदमा विभिन्न प्रजातीका चरा रारा आउने गरेका छन् । विगतका तुलनामा यो वर्ष धेरै संख्यामा चरा आएका हुन् ।

रारा ताल पर्यटकको आर्कषण केन्द्र भएपनि पन्छीकाहरुका लागि आश्रय स्थलका रुपमा समेत रहेको निकुञ्ज प्रमुख घिमिरेको भनाई छ ।