काठमाडौँ । पछिल्लो समय ठूला सहकारी संस्थाहरु धमाधम समस्याग्रस्त बन्दै गएका छन् । भूमि व्यवस्था सहकारी तथा गरिबी निवारण मन्त्रालयले डेढ दर्जन बढी ठूला सहकारी संस्थालाई समस्याग्रस्त घोषणा गरिसकेको छ ।

मन्त्रालयले मंगलबार मात्रै ललितपुरको पुल्चोकमा रहेको लालीगुराँश बहुद्धेश्य सहकारीलाई समस्याग्रस्त घोषणा गरेको छ । प्रवाह भएको कर्जा असूली नभएपछि सहकारी धमाधम समस्याग्रस्त बन्दै गएका छन् ।

यता ललितपुर महानगरपालिकाले सहकारीबाट कर्जा लिएका ऋणीहरूलाई समयमा कर्जा तिर्न ताकेता गरेको छ ।

बुधबार एक सूचना जारी गर्दै महानगरपालिकाले ऋण लिएका ऋणीहरूले समयमा नै भुक्तानी नगर्दा सहकारी समस्यामा परेको गुनासो आएको जानकारी गराउँदै ऋणीहरूलाई कर्जा तिर्न भनेको हो ।

महानगरपालिकाले ऋणीहरूले समयमानै कर्जा नतिरे कारबाही गर्ने चेतावनी समेत दिएको छ । पछिल्लो समय सहकारीहरूले बचतकर्ताको रकम फिर्ता गर्न नसक्दा समस्याग्रस्त भइ सञ्चालक नै फरार रहेको अवस्थामा महानगरले पनि आफनो क्षेत्रधिकारभित्र रहेका सहकारीका सम्बन्धमा चाँसो देखाउँदै सूचना सार्वजनिक गरेको हो ।

ऋणीले कर्जा नतिरे महानगरपालिकाले सहकारी ऐन २०७५ को दफा ६२ बमोजिम कारबाही गर्ने चेतावनी दिएको हो । ऋणी सदस्यहरूको खाता, जायजेथाको स्वामित्व हस्तान्तरण, नामसारी वा बिक्री गर्न नपाउने गरी रोक्का राख्न सम्बन्धित निकायमा लेखी पठाउने बताएको छ ।

महानगरपालिकाले प्रचलित सहकारी ऐन, नियमावली, निर्देशिका एवं मापदण्डको बर्खिलाप नहुने गरी जुन सम्झौता वा सर्त बमोजिम ऋण लिएको हो सो सोहि बमोजिम कर्जाको साँवा र ब्याज सम्वन्धित सहकारी संथमा समयमा नै भुक्तानी गरी सहकारीमा देखिएको समस्या समाधानका लागि सहयोग गर्न सबै ऋणी सदस्यहरुमा अनुरोध समेत गरेको छ ।