काठमाडौं । हिरो मोटरसाइकल नेपालमै उत्पादन हुन थालेको छ । यसअघि भारतबाट आयात हुने गरेकोमा चौधरी ग्रुपसँगको साझेदारीमा हिरो मोटरसाइकाल र स्कूटर उत्पादन नेपालमा हुन थालेको हो । भारतको हिरो मोटरकर्पको साझेदारीमा चौधरी ग्रुपको सिजी मोटरले नेपालमै हिरो मोटरसाइकलको ‘एसेम्बल’सुरु गरेको छ ।

हिरोका एक्सपल्स २०० फोर भि, सुपर स्पेलेन्डर र स्प्लेन्डर प्लसका साथै ११० सिसीको जुम स्कूटर नबलपरासीस्थित सिजी इन्डष्ट्रियल पार्कमा रहेको अत्याधुनिक प्लान्टमा एसेम्बल गरिने सिजीले जनाएको छ । सिजीले विभिन्न चार उत्पादनको आइतबार सार्वजनिक गरेको छ ।

सञ्चालनमा आएको एसम्बल प्लान्टबाट वार्षिक ७५ हजार युनिट मोटसाइकल र स्कूटर उत्पादन हुने कम्पनीले जनाएको छ । यसले नबलपरासीमा नयाँ लगानी ल्याउन र रोजगारीको अवसर सिर्जना गर्ने कम्पनीको भनाई छ । सिजी मोटर्सले मुलुकभर सेल्स तथा सर्भिस सेन्टर नेटवर्कको द्रुत विकास गरिरहेको जानकारी दिएको छ ।

आगामी तीन महिनाभित्र १०० भन्दा बढी सेल्स तथा सर्भिस आउटलेटहरू खोल्ने सिजीको लक्ष्य छ । सिजी मोटर्सले काठमाडौंमा हिरोको प्रमुख तथा फ्ल्यागसिप सोरुम खोलिसकेको छ ।

नेपालमा एसम्बल भएको हिरो मोटरसाइकल सार्वजनिक गर्दै चौधरी ग्रुपका प्रबन्ध निर्देशक निर्वाण चौधरीले सिजी मोटर्सका लागि हिरो मोटोकर्पसँगको सहकार्य विशेष क्षण भएको बताए । ‘सिजी मोटर्सका लागि यो एकदमै विशेष क्षण हो । हामी हाम्रो एसेम्बली सुविधाको उद्घाटन गर्न र नयाँ उत्पादनहरू ‘लन्च’ गर्न पाउँदा उत्साहित छौं ।’

हिरो मोटोकर्पको उत्पादन तथा व्यापार प्रक्रियाका विश्वस्तरीय दक्षता सञ्चालन विस्तार गर्नका लागि धेरै लाभदायक हुने उनले बताए । उनले हिरो मोटरसाइकल देशभर एक बलियो बजार उपस्थिति निर्माण गर्न तत्पर रहेको जानकारी गराए ।

उनले देशबाट युवाहरू बाहिरिरहेका बेला कम्पनीले आशा देखेको बताए । उनले हरेक मानिसभित्र एक हिरो हुने बताउँदै हिरोले नेपाली बजारमा अझै नयाँ उचाइ बनाउने चौधरीले दाबी गरे ।

उनले हिरो मोटोरसाइकलको प्रविधि, मूल्य र बिक्रीपछिको सेवामा कुनै शंका गर्न नमिल्ने स्पष्टपारेका छन् ।

नयाँ एसेम्बली सुविधा नेपालको मध्यभागमा अवस्थित छ । जसले गर्दा हिरोका उत्पादनहरू द्रूतरूपमा देशभर उपलब्ध हुने सुनिश्चितता प्रदान गर्ने भएको छ । साथै, सेल्स तथा सर्भिस नेटवर्कको द्रूत विस्तारले सबै ग्राहक आवश्यकताहरू निर्वाधरूपमा सम्बोधन गरिएको सुनिश्चित गर्ने उनले जानकारी दिए ।

सहकार्यबारे हिरो मोटोकर्पको ग्लोबल बिजनेस युनिटका चिफ बिजनेस अफिसर सञ्जय भानले नवीनता र प्रविधिलाई मूल मन्त्र मानेर विश्वभरका ग्राहकलाई विश्वस्तरीय उत्पादनहरू प्रदान गर्न प्रतिबद्ध रहेको जानकारी दिए ।

नयाँ सहकार्यले हिरो मोटोकर्प, सिजी मोटर्स र नेपालका लागि उत्साहजनक क्षण भएको उनले बताए । अत्याधुनिक एसेम्बली युनिटले अब विश्वस्तरीय उत्पादन र देशभरका ग्राहकहरूका लागि सजिलै उपलब्ध हुने उनले जानकारी दिए ।

‘सेल्स र सर्भिस नेटवर्कको द्रूत विस्तारले हामीलाई हाम्रा विश्वस्तरीय उत्पादनहरू र सेवाहरूसँग बजार जोड्न सक्षम बनाउँछ । हाम्रो साझेदार सिजी मोटर्ससँगै नेपालमा हाम्रो नयाँ फोकसले नेपालप्रतिको हाम्रो प्रतिबद्धतालाई प्रतिबिम्वित गर्दछ, जुन हाम्रो लागि निकै महत्वपूर्ण बजार हो’ उनले भने । उनले यसअघि हिरो एक नम्बर रहेको र अहिले खसकिए पनि निर्वाण चौधरीको नेतृत्वमा फेरि एक नम्बरमा जाने बताए । उनले एक वर्षभित्र विद्युतीय सवारी बजारमा ल्याउने पनि बताए ।

सन् २०१४ मा नेपालमा प्रवेश गरेको हिरोले बर्षौंदेखि सुपर स्प्लेन्डर र एक्सपल्स २०० मोटरसाइकलहरूजस्ता सर्वाधिक रुचाइएका प्रतिष्ठित उत्पादनका साथ आफूलाई देशकै अग्रणी मोटरसाइकल ब्रान्डको रूपमा स्थापित भएको छ ।

कम्पनीका लागि एसियामा नेपाल एक प्रमुख बजार हो । सिजी नेपालको व्यापार परिदृश्यमा एक प्रमुख व्यावसायिक घराना हो ।