काठमाडौं । साँग्रिला हस्पिटालिटी ग्रुपले चितवनको मेघौलीमा लक्जरी रिसोर्ट सञ्चालन गर्ने भएको छ । ग्रुपले लस्ट होराइजन सफारी रिसोर्ट एन्ड स्पा निर्माण गरिरहेको छ ।

रिसोर्टको दोस्रो फेज सन् २०२६ डिसेम्बरसम्म सञ्चालनमा ल्याउने योजना छ । रिसोर्टको पहिलो फेज २०२५ को अप्रिलमा ल्याउने योजना रहेको साँग्रिलाले जनाएको छ । रिसोर्ट व्यवस्थापनको जिम्मेवारी इन्टरकन्टिनेन्टल होटल्स ग्रुप (आइएचजी) ले पाएको छ ।

२०२२ डिसेम्बरमा होटल व्यवस्थापनका लागि लस्ट होराइजन र आइएचजीबीच सम्झौता भएको थियो । सम्झौताअनुसार रिसोर्ट इन्टरकन्टिनेन्टल रिसोर्ट चितवन मेघौली ब्राण्डमा सञ्चालन हुने भएको छ ।

इन्टरकन्टिनेन्टल होटल्स ग्रुप प्रमुख युरोपेली होटल समूहहरुको होटल व्यवस्थापन सम्झौतामार्फत रिसोर्टलाई साझेदारी गर्न सक्षम पार्दै आइएचजीको ब्रान्ड नाम स्थापित छ । फ्रेंचाइजीले रिसोर्टको व्यवसाय विस्तारमा सहयोग पुर्याउने छ ।

लस्ट होराइजनको सञ्चालक प्रसिद्धबहादुर पाण्डे रहेका छन् । रिसोर्ट ४० कोठाको हुनेछ । जसमध्ये दुई स्वीट रुम हुने लस्ट होराइजनले जनाएको छ ।

रिसोर्ट राप्ती खोलाको किनारमा रहेको छ । पहिला ४० कोठा डिजाइन गरिएकोमा यसलाई दोब्बर बनाएर ८० कोठा पुर्याइने भएको छ ।

लस्ट होराइजनको अनुमानित लागत १ अर्ब २९ करोड ५० लाख रुपैयाँ रहेको छ । जसमध्ये बैंकबाट ९३ करोड ७० लाख रुपैयाँ ऋण र बाँकी संस्थापकहरुको स्वपुँजी लगानी हुने छ ।

यसअघि रिसोर्ट बनाउन बैंकबाट साढे ४८ करोड रुपैयाँ ऋण लिने योजना भए पनि डिजाइन र स्कोप परिवर्तनका साथै ढिलाइले गर्दा ९३ करोड ७० लाख रुपैयाँ लिनुपर्ने भएको छ ।

सन् २०२४ जनवरीसम्म होटलको ५५ प्रतिशत वित्तीय प्रगति भएको छ । ७२ प्रतिशत बैंकको ऋण र बाँकी २८ प्रतिशत संस्थापकको स्वपुँजी (इक्विटी) हुने गरि लगानी संरचना बनाइएको छ ।

रिसोर्टको प्रति कोठा लागत बढेर ३ करोड २० लाख रुपैयाँ पुगेको छ । मेघौली चितवन राष्ट्रिय निकुञ्ज नजिक पर्यटकीय क्षेत्रमा बन्दै छ ।

पोखराको बेगनासमा रिसोर्ट बन्दै

साँग्रिलाले पोखराको बेगनासमा पनि लक्जरी रिसोर्ट बनाइरहेको छ । ग्रुपले पोखराको बेगनासमा लक्जरी रिसोर्ट सञ्चालनमा ल्याउने भएको छ ।

ग्रुपले अहिले रिसोर्टको निर्माण गरिरहेको छ । सांग्रिलाले १ अर्ब ४९ करोड ५० लाख रुपैयाँ लगानीमा लस्ट होराइजन प्रालि रिसोर्ट सञ्चानलमा ल्याउन लागेको हो ।

रिसोर्ट सन् २०२६ डिसेम्बरभित्र सञ्चालनमा ल्याउने तयारी भएको छ । अहिलेसम्म रिसोर्टको ५६ प्रतिशत वित्तीय प्रगति भएको छ । ७३ प्रतिशत बैंकको ऋण र बाँकी २८ प्रतिशत संस्थापकले इक्विटी हुने गरी लगानी संरचना तयार पारिएको छ ।

प्रतिकोठा लागत बढेर ३ करोड ९० लाख रुपैयाँ पुग्ने अनुमान गरिएको छ । होटलमा ४० कोठाहरु बन्ने भएको छ । जसमध्ये दुईटा स्वीट रुम हुने ग्रुपले जानकारी दिएको छ । होटल व्यवस्थापनको जिम्मा आइएचजीले लिएको छ । इन्टरकन्टिनेन्टल रिसोर्ट पोखरा बेगनास ब्राण्डमा सञ्चालन हुनेछ ।

साँग्रिलाले काठमाडौं र पोखरामा दुईटा पाँचतारे होटल निर्माण गरिरहेको छ ।