काठमाडौं । प्रस्तावित २ सय ८५ मेगावाटको माथिल्लो तमोर अर्धजलाशय जलविद्युत आयोजनालाई लगानी जुटेको छ । आयोजनामा एभरेष्ट बैंकको अगुवाइमा ऋण लगानी हुने भएको छ । प्रधानमन्त्री पुष्पकमल दाहालको उपस्थितिमा आयोजनाको विकासकर्ता तमोर इनर्जी प्रालि र अगुवा बैंकको तर्फबाट एभरेष्टसँग बिहीबार साँझ ऋण लगानी सम्झौता हुने भएको छ ।

लगानी जुटेकाले आयोजना बन्ने सुनिश्चित भएको छ । अगुवा बैंक एभरेष्ट भए पनि अन्य बैंकसँग छलफल भइरहेको तमोर इनर्जीका अध्यक्ष पुष्पज्योति ढुंगानाले बताए । बिहीबार नै बैंकको टुंगो लाग्ने उनले सुनाए । आयोजना बनाउन ५५ अर्ब रुपैयाँ लाग्ने संभाव्यता अध्ययनले देखाएको छ । नेपाल विद्युत प्राधिकरणले आयोजनाको विकासकर्ता तमोर इनर्जीबीच विद्युत खरिदबिक्री सम्झौता (पिपिए) भइसकेको छ ।

कम्पनीले ऊर्जा, जलस्रोत तथा सिँचाइ मन्त्रालयबाट २ सय ८५ मेगावाटसम्म विद्युत उत्पादन अनुमतिपत्र (लाइसेन्स) पाएको छ । २०७५ जेठ २७ गते तमोरले आयोजनाबाट बिजुली उत्पादन गर्न मन्त्रालयबाट लाइसेन्स पाएको हो ।

तत्कालिन प्रधानमन्त्री केपी शर्मा ओलीको अध्यक्षतामा २०७८ असार ८ गते बसेको लगानी बोर्डको ४७ औं बैठकले २ सय ८५ मेगावाटको माथिल्लो तमोर जलासयको लगानी स्वीकृत गरेको थियो । आयोजनाबाट वार्षिक १ अर्ब ४७ करोड ९८ लाख युनिट विद्युत ऊर्जा उत्पादन हुने अध्ययनले देखाएको छ । जसअनुसार १ अर्ब ३ करोड ३६ लाख र सुक्खायाममा ४४ करोड ६२ लाख १६ हजार युनिट बिजुली उत्पादन हुने छ । अर्धजलाशय आयोजनाले सुक्खायाममा ६ घण्टासम्म पूर्ण क्षमतामा बिजुली उत्पादन गर्नेछ ।

विद्युत प्राधिकरणले आयोजनाबाट उत्पादन हुने बिजुली बर्खामा प्रतियुनिट ४ रुपैयाँ र सुक्खायाममा (पिकिङ) अवधिका लागि प्रतियुनिट १० रुपैयाँ ५५ पैसा र पिकिङ नभएको अवधिका लागि प्रतियुनिट ८ रुपैयाँ ४० पैसा निर्धारण गरेको नियमन आयोगले जनाएको छ । यस्तै प्रस्तावित आयोजनाको पीपीए दरअनुसार वार्षिक ३ प्रतिशतका दरदे ८ पटकसम्म मूल्यवृद्धि हुनेछ ।

गैरआवासीय नेपालीले प्रवद्र्धन गरेको सानिमा हाइड्रो ग्रुपले आयोजनाको जलविद्युत लगानीकर्ता ढुंगानालाई बेचेको हो । ढुंगानाले ४४ मेगावाटको माथिल्लो मादी आयोजना सञ्चालन गरिरहेका छन् ।

अहिले आयोजनाको अध्यक्ष ढुंगाना रहेका छन् । आयोजना ताप्लेजुङको फक्तालुङ गाउँपालिका र फुङलिङ नगरपालिकामा पर्छ ।