काठमाडौँ। नेपाल विद्युत् प्राधिकरणले चालु आर्थिक वर्षमा सुदूरपश्चिमका तीन हजार ७ सयभन्दा बढी ग्राहकको लाइन काटेको छ । समयमै विद्युत् महसुल नबुझाउने ग्राहकको प्राधिकरणले लाइन काटेको हो ।

सुदूरपश्चिमका नौ वटै जिल्लाका महसुल नबुझाउने ग्राहकका कारण करोडौँ रकम बक्यौता रहेपछि प्राधिकरणले महसुल बुझाउन अटेरी गर्ने ग्राहकको लाइन काट्न थालेको हो । सुदूरपश्चिममा यो वर्ष उठ्न बाँकी ६ करोड ३५ लाख बक्यौता रकम मध्ये लाइन काटेर प्राधिकरणले साढे चार करोड महसुल असुल गरेको प्रादेशिक कार्यालय अत्तरियाका निर्देशक जंगबहादुर चन्दले जानकारी दिए ।

उनले भने, ‘नेपाल विद्युत् प्राधिकरणले चालु आर्थिक वर्षमा सुदूरपश्चिमका तीन हजार ७ सय १२ जना ग्राहको विद्युत् लाइन काटिएको छ । विद्युत् महसुल तिर्न अटेरी गर्दा बाध्य भएर लाइन काट्नु परेको हो ।’ सुदूरपश्चिमका नौ जिल्लाका ग्राहकबाट ६ करोड ३४ लाख ९४ हजार महसुल बक्यौता देखिएपछि प्राधिकरणले लाइन काट्न सुरु गरेको बताइएको छ ।

नेपाल विद्युत् प्राधिकरणले लाइन काटेका तीन हजार ७ सय १२ ग्राहक मध्ये २ हजार ५ सय ६२ जनाले बक्यौता तिरेर लाइन जडान गरेका छन् । लाइन लाटिएका एक हजार एक सय ५० ग्राहकले अझै लाइन जोडेका छैनन् । लाइन जोड्ने ग्राहकबाट प्राधिकरणले यो वर्ष चार करोड ५३ लाख ७४ हजार बक्यौता रकम असुल भएको निर्देशक चन्दले बताए ।

नेपाल विद्युत् प्राधिकरणले सुदूरपश्चिमका नौ जिल्लामा १२ वितरण केन्द्रबाट विद्युत् सेवा प्रदान गरिरहेको छ । पहाडी जिल्लामा विद्युत् सेवा नपुगेका स्थानमा समेत विद्युतीकरणको काम भइरहेको छ । हाल सुदूरपश्चिममा प्राधिकरणका तीन लाख ६७ हजार २७० ग्राहक रहेका छन् ।

यो संख्या गत वर्षको भन्दा २८ हजारले बढेको निर्देशक चन्दले जानकारी दिए । नेपाल विद्युत् प्राधिकरणले प्रदेश भर विद्युत् सेवा प्रदान गर्न प्रदेशका विभिन्न स्थानमा वितरण केन्द्र निर्माण र विद्युतीकरणको काम गरिरहेको छ ।

२०८१ को अन्तसम्म प्रदेशका सम्पूर्ण क्षेत्रमा विद्युत् विस्तार गर्ने योजना अनुसार ठेक्का सम्झौता भएर काम भइरहेको प्राधिकरणले जनाएको छ ।