काठमाडौं । नेकपा एमालेका सचिव योगेशकुमार भट्टराईले राष्ट्रिय स्वतन्त्र पार्टीले प्रधानमन्त्री पुष्पकमल दाहाललाई समर्थन नगर्न आग्रह गरेका छन् । आईतबार बसेको प्रतिनिधि सभाकोे बैठकमा विशेष समय लिएर बोल्दै सांसद भट्टराईले राष्ट्रिय स्वतन्त्र पार्टीलाई यस्तो आग्रह गरेका हुन् ।

उनले प्रधानमन्त्री पुष्पकमल दाहालले प्वाल पारिसकेको डुङ्गामा बस्न उपयुक्त नभएको सुझाव दिए । उनले रास्वपाले प्रधानमन्त्रीलाई साथ दिइरहँदा अरुलाई पद र गरिमाका विषयमा उठाएको प्रश्नले सार्थकता नपाउने बताए । उनले प्रधानमन्त्री दाहाललाई साथ दिएर रास्वपालाई नै क्षति हुने भन्दै एक पटक सरकारलाई दिएको समर्थनका विषयमा सोच्न आग्रह गरे ।

उनले संसदका दुई ठूला दल सहकार्य गरेर जाने निर्णय गरिसक्दा पनि प्रधानमन्त्री दाहालले २८ गतेसम्म लम्ब्याउन नमिल्ने धारणा राखे । उनले संसदमा विश्वासको मत भन्दा पनि संसदबाट राजीनामा घोषणा गर्नुउपयुक्त हुने बताए । उनले पहिलो पटक विश्वासको मत लिँदा २६८,दोस्रोमा १७२,तेस्रो र चौथो पटक १५७ मत प्राप्त भएको भन्दै अब विश्वासको मत लिइराख्नु औचित्य नरहेको बताए ।

उनले भने, ‘संसदका दुई ठूला दल सहकार्य गरेर जाने निर्णय गरिसक्यो । प्रधानमन्त्री २८ गतेसम्म लम्ब्याउने कुरा किन भयो । बुझ्नसकेका छैनौं । प्रधानमन्त्रीले विश्वास र समर्थन गुमाई सक्नुभएको छ । यस्तो बेलामा प्रधानमन्त्रीले संसदबाट राजीनामा घोषणा गर्नु उपयुक्त हुन्छ । उहाँले पहिलो पटक विश्वासको मत लिँदा २६८,दोस्रोमा १७२,तेस्रो र चौथो पटक १५७ मत प्राप्त गर्नुभयो ।

अब उहाँले विश्वासको मत लिँदा कति मत प्राप्त गर्नुहुन्छ । म राष्ट्रिय स्वतन्त्र पार्टीलाई भन्न चाहन्छु । उहाँहरु सत्तापक्षमा बस्नुभएको छ । उहाँहरुको पार्टीको निर्णय र इच्छा हो । हामीले भन्नु केही छैन । तर प्रधानमन्त्रीले प्वाल पारि सकेको डुङ्गामा बसि रहनु भएको छ भने तपाईहरु कता जाँदै हुनुहुन्छ । एक पटक सोच्नुहोला । राष्ट्रिय स्वतन्त्र पार्टीले जुन ढङ्गले अरुलाई पद र गरिमाको प्रश्न उठाई राख्नु भएको छ । त्यस हिसावले सोच्न आग्रह गर्दछु ।’

उनले प्रधानमन्त्री पुष्पकमल दाहालमा देखिएको निरन्तरको अस्थिरताले देशले आत्मविश्वास नै गुमाउन थालेकाले कांग्रेस र एमाले मिल्नुपर्ने परिस्थिति बनेको बताए । उनले संविधान जारी भएको ८ वर्षभित्र दाहालले ६ पटकभन्दा बढी यता र उता गर्दै सत्ताको खेलमा लिप्त रहेका कारण स्वभाव बुझ्न समेत गाह्रो भएको बताए । उनले संविधान निर्माणपछि देशलाई स्थितिरमा लैजाने बेला एमाले र काँग्रेससँग सहकार्यको गर्दै सत्तामा बसिरहने खेल खेलेको बताए ।

उनले एमाले मिसन ग्रासरुट र मिसन ८४ मा लागेका बेला फेरि सहयोग माग्दा सहयोग गरेपश्चात समेत लो प्रोफाइलका मन्त्रालय लिएर काम गर्न दिँदा पनि एमालेप्रति नै अविश्वास गरेको आरोप लगाए । उनले कांग्रेसलाई बोलाएर राष्ट्रिय सरकार बनाउन प्रश्ताव गरेकाले एमालले सोच्न बाध्य भएको बताए । उनले राष्ट्रिय सरकारको कुरा नाजायज नभए पनि आजको अवस्थामा राष्ट्रिय सरकारको नेतृत्व दाहालले गर्न नसक्ने बताए ।

उनले मुलुकको आत्माविश्वास दिनप्रतिदिन गुम्दै गएको र नेपालप्रति अन्तर्राष्ट्रिय समुदायको विश्वास गुम्दै गएको बताए । उनले बैशाखमा भएको लगानी सम्मेलनमा १० अर्बको पनि लगानी प्रतिवद्धता नभएकोले पनि देखाएको बताए । उनले कर्मचारीतन्त्र,सुरक्षा निकायले आत्माविश्वास गुमाएको दाबी गरे ।

उनले जनतामा निरासा,आक्रोस र पलायन भएकाले मुलुक संकटग्रस्त अवस्थामा पुगेको बताए । उनले संविधान बनेको र कार्यान्वयन गरेको १० वर्ष भएकाले संवैधानिक व्यवस्था अनुसार प्रत्येक १० वर्षमा संविधानको पुनरावलोकन गर्ने ठिक समय भएको बताए । उनले संघीय,प्रदेश र स्थानीय सरकारको गठन,संवैधानिक अंगहरुको कामकारबाही लगायतका विषयमा पुनरावलोकन गर्न आवश्यक रहेको बताए ।

उनले भने,‘ मुलुकको आत्माविश्वास दिनप्रतिदिन गुम्दै गयो । नेपालप्रति अन्तर्राष्ट्रिय समुदायको विश्वास गुम्दै गयो । बैशाखमा भएको लगानी सम्मेलनमा १० अर्बको पनि लगानी प्रतिवद्धता भएन । तीन वर्षअघिको लगानी सम्मेलनमा ठूलो लगानी प्रतिवद्धता भएको थियो । कर्मचारीतन्त्र,सुरक्षा निकायले आत्माविश्वास गुमाएको अवस्था छ । राज्यका निकायहरुले ठिक ढङ्गले काम गरिरहेका छैनन् । संवैधानिक अंगहरुको अवस्था त्यस्तै छ ।

जनतामा निरासा र आक्रोस,पलायन छ । श्रमिकको रुपमा वा उच्च शिक्षा अध्ययनको निम्ति होस् । मुलुकको जनशक्ति र पुँजी दुबै पलायन भइरहेको छ । यसरी हेर्दा मुलुक संकटग्रस्त अवस्थामा छ । संविधान बनेको र कार्यान्वयन गरेको १० वर्ष भएको छ । संवैधानिक व्यवस्था अनुसार प्रत्येक १० वर्षमा संविधानको पुनरावलोकन गर्नेछ । संविधान संशोधन गर्ने ठिक बेला आएको छ । संघीय,प्रदेश र स्थानीय सरकारको गठन,संवैधानिक अंगहरुको कामकारबाही लगायतका विषयमा पुनरावलोकन गर्ने अवस्थामा छौं । समावेशी,समानुपातिक निर्वाचन प्रणालीलाई अवलम्वन गरेका छौ ।

संसदमा देशको प्रतिनिधित्व भएको छ । मुलुकको राष्ट्रिय एकतालाई कसरी बनाउने भन्ने विषय संविधानमा संशोधन गर्नुपर्ने छ । यी नै आवश्यकतालाई ध्यान दिँदै अन्तर्राष्ट्रिय समुदाय र नेपाली विज्ञहरुको विचारको आधारमा नेकपा एमाले र नेपाली काँग्रेस एक ठाउँमा उभिएर तमाम समस्याको समाना गर्नुपर्ने बेला आएको भनेर काँगे्रससँग सहकार्य गर्ने निर्णय गरेको हो ।’

भट्टराईले अब कांग्रेस र एमालेबीचमा देशको आत्मविश्वास बढाउन र लगानीको वातावरण बनाएर अर्थतन्त्र लयमा फर्काउन बलियो सरकारको सहमति भएको बताए ।