काठमाडौं । मुलुककै सबैभन्दा ठूलो रेमिट कम्पनी आइएमई लिमिटेडले जिएमई रेमिट प्रालिलाई प्राप्त (एक्विजिसन) गरेको छ ।

प्राप्त प्रक्रिया पुरा गरेको कम्पनीले यही साउन ३० गतेदेखि आइएमई लिमिटेडको नाममा एकीकृत रेमिट कारोबार गर्ने भएको छ । एकीकृत कारोबार गर्न आइएमईले कम्पनी रजिष्टारको कार्यालयबाट स्वीकृति पाएको छ ।

नियामक नेपाल राष्ट्र बैंकबाट अन्तिम स्वीकृति पाएपछि एकीकृत कारोबार हुन लागेको हो । आइएमई र जिएमईले गत जेठ ९ गतेको विशेष साधारणसभाबाट एक्विजिसनमा जाने प्रस्ताव पारित गरेको थियो । एक्विजिसनपछि आइएमईको बजार विस्तार भई कारोबार थप बढ्न गई अझ मजवुत रेमिट कम्पनी बन्ने भएको छ ।

नेपालमा विदेशबाट रेमिट्यान्स भित्र्याउनेमा आइएमई पहिलो नम्बरमा रहेको छ । कूल रेमिट्यान्समा साढे २७ प्रतिशत हिस्सा आइएमईको छ । आइएमई लिमिटेड सबैभन्दा बढी रेमिट्यान्स भित्र्याउने कम्पनीको रूपमा सम्मानित भएको छ ।

राष्ट्र बैंकको ६९ औं वार्षिकोत्सवको अवसरमा गत वैशाख १५ गते आर्थिक वर्ष २०७९/०८० मा सबैभन्दा बढी रेमिट्यान्स भित्र्याउने कम्पनीहरू मध्येबाट आइएमईलाई सम्मान गरिएको थियो । राष्ट्र बैंकका गभर्नर महाप्रसाद अधिकारीले कम्पनीका प्रमुख कार्यकारी अधिकृत (सिइओ) खिलेन्द्र पौडेललाई सम्मान गरेका थिए ।

आइएमई २४ वर्षमा प्रवेश गरेको छ । सन् २००१ मा व्यसायीक चन्द्रप्रसाद ढकालले इन्टरनेसन मनी एक्सप्रेसको स्थापना गरेका हुन् । कम्पनीको नाम परिवर्तन भएर आइएमई लिमिटेड बनेको हो । ढकालले आइएमईको नाममा ठूलो व्यवसायिक साम्राज्य खडा गरेका छन् । ग्रुपको बैंक, बिमा, जलविद्युत, होटल, केबुलकार, कागज उद्योगलगायतमा ठूलो लगानी छ ।

आइएमईले साधारण सेयर (आइपिओ) निष्कासन गर्ने भएको छ । कम्पनीले आइपिओ निष्कासन गर्नका लागि नेपाल धितोपत्र बोर्डमा दरखास्त दिइसकेको छ । आइएमईले १० करोड रुपैयाँ बराबरको १० लाख कित्ता आइपिओ निष्कासन गर्न लागेको हो ।

आइएमई लिमिटेडले विश्वभर विश्वस्तरीय मनी ट्रान्सफर सेवाहरू प्रदान गर्दै आएको छ । आइएमईको विश्वव्यापी पहुँचका कारण विश्वका दुई सयभन्दा बढी देशहरूबाट मुलुकमा विप्रेषण भित्रिने गरेको छ । कम्पनीको विश्वभर १० लाखभन्दा बढी स्थानहरूमा फैलिएको नेटवर्क छ ।

कम्पनीले सेवा शुभारम्भको २४ औँ वर्षसम्ममा नेपालका सहरी तथा ग्रामीण क्षेत्रलाई समेट्ने गरी २ सय २५ आइएमई सेन्टरसहित ७७ जिल्लाका करिब १२ हजार सब एजेन्ट र बैंक तथा वित्तीय संस्थाका शाखामार्फत विदेशमा कार्यरत नेपालीले कमाएको रकम देशका विभिन्न भूगोलमा रहेका आफन्तको हातमा छिटो, छरितो, विश्वसनीय र सुरक्षित तवरबाट वितरण गर्दै आइरहेको छ ।

यस्तै जिएमई रेमिटले पछिल्लो समय आफ्नो बजार हिस्सा फराकिलो बनाउँदै लगेको थियो । सन् २०१२ मा स्थापना भएको बेष्ट रेमिट नेपाल प्रालिको सफल अधिग्रहण पछि सन् २०१६ मा जिएमई रेमिटको स्थापना भएको थियो ।