काठमाडौं । नेपाली कांग्रेसका केन्द्रीय सदस्य एवं शिक्षा विभाग प्रमुख नैनसिंह महरले नेकपा एमालेलाई दानवापत लिएको जग्गा फिर्ता गर्न आग्रह गरेका छन् । महरले एमालेको पार्टी कार्यालय बनाउन भाटभटेनीका सञ्चालक व्यवसायी मीनबहादुर गुरुङ र सावित्री गुरुङले दान गरेको १० रोपनी १४ आना जग्गा प्रधानमन्त्री केपी शर्मा ओलीले तत्काल फिर्ता गरेको घोषणा गर्न सुझाव दिएका हुन् ।

नेपाली कांग्रेसका सम्पर्क समितिहरूसँगको वानेश्वरमा आयोजित भेटघाट कार्यक्रममा बोल्दै महरले यस्तो बताएका हुन् ।

महरले जनतामा छरिएको निराशालाई आशामा परिणत गर्न वर्तमान गठबन्धन बनेको सम्झाउँदै प्रधानमन्त्रीले कसैबाट दानदातब्य र नजराना लिनु सुशासनको खिलाफ हुने भएकाले जनतामा आशा जगाउन तत्काल सो जग्गा फिर्ता गर्न आग्रह गरे ।

दानकर्ता मिनबहादुर गुरुङ दम्पत्तीप्रति आफूहरुको कुनै आग्रहपुर्वाग्रह नरहेको बताउँदै नेता महरले गुरुङ दम्पत्ती अस्पताल लगायत ठाउँमा दान गरिरहेका दानविर व्यवसायी समेत रहेका बताए । तर व्यवसायी गुरुङमाथि उठेको प्रश्नको निरुपण नभएसम्म कुनै पनि राजनीतिकले सहयोग लिनु वदनियतपूर्ण कार्य हुने महरको भनाइ छ ।

ललिता निवास जग्गा प्रकरणमा गुरुङलगायतको मुद्दा अदालतमा विचाराधीन अवस्थामा रहेकै बेला देशको कार्यकारी प्रमुखले पार्टी कार्यालयका लागि दानको जग्गा लिई त्यसमा भवन बनाउने कुराले देशमा विधिको शासन छ कि छैन् भनेर जनताले नै प्रधानमन्त्री माथी प्रश्न उठाउने नेता महरको टिप्पणी छ ।