विराटनगर । श्री एयरलाइन्सको उडान रद्ध भएपछि विराटनगर विमानस्थलमा अहिले लफडा भइरहेको छ । विराटनगर–काठमाडौंको साँझ ७ बजेको उडान रद्ध भएको हो । उडान रद्ध भएपछि यात्रु आक्रोशित बनेका छन् । प्रहरीका अनुसार विराटनगर विमानस्थल हुँदै काठमाडौं जान ८० जना यात्रुले टिकट काटेका थिए । यात्रुहरुलाई उडान रद्ध भएको जानकारी करिब ८ः३० बजेतिर मात्रै दिइएको थियो ।

काठमाडौं जान साँझ ६ बजेदेखि नै यात्रुहरु विमानस्थल पुग्न थालेका थिए । अचानक उडान रद्ध भएको जानकारी पाएपछि आफूहरु अलपत्र परेको भन्दै यात्रु आक्रोशित भएको प्रहरीले जनाएको छ ।

अहिले राति १० बजेपछि काठमाडौंमा विमानस्थल बन्द हुन्छ । जहाज आएर काठमाडौं फर्कन नभ्याउने भएपछि उडान रद्ध गर्नुपर्ने अवस्था आएको जानकारी एयरलाइन्सले यात्रुहरुलाई दिएको छ ।

साँझको उडान रद्ध भएको र भोलिपल्ट बिहान १० बजे काठमाडौं लैजाने जानकारी यात्रुहरुलाई दिइएको थियो । त्यसपछि आक्रोशित बनेका यात्रुहरुले होहल्ला गरिरहेका छन् ।

उनीहरुले रातको समयमा एयरलाइन्सले अलपत्र पारेको भन्दै आक्रोस पोखिरहेका हुन् । भीडले विमानस्थलभित्र एयरलाइन्सको काउन्टर अगाडि होहल्ला गरिरहेको प्रहरीले जनाएको छ ।

मोरङ प्रहरी प्रमुख एसपी नारायणप्रसाद चिमरियाले उडान रद्ध भएको विषयलाई लिएर यात्रुहरुले विवाद गरिरहेको बताए । आक्रोसित बनेका यात्रुहरुलाई सम्झाइबुझाइ गर्ने काम भइरहेको उनको भनाइ छ ।

कुनै अप्रिय घटना हुन नदिन प्रहरी परिचालन गरेर सुरक्षा व्यवस्था मिलाइएको चिमरियाले बताए । ‘त्यति ठूलो लफडा हैन । सामान्य वादविवाद भइरहेको छ । एयरलाइन्सका कर्मचारीमा जवाफदेहिता नदेखिएको गुनासो यात्रुहरुले गरिरहेका छन् । भिडलाई शान्त पार्ने प्रयास भइरहेको छ,’ उनले भने ।