काठमाडौं । संसद विघटन बाध्यता भएको प्रधानमन्त्री केपी शर्मा ओलीकाे दाबी छ । साेमबार सरकारकाे तीन वर्षका उपलब्धी सार्वजनिक कार्यक्रममा ओलीले नेकपाकै नेताहरुले सरकार सञ्चालनमा असहयोग गर्नुका साथै समानान्तर सरकार सञ्चालनको प्रयास गरेका कारण प्रतिनिधि सभा विघटन गर्नु परेको बताएका हुन् ।

ओलीले संसद विघटन गर्न नपरोस् भनेर आफूले अन्तिम समयसम्म कोसिस गरेको पनि बताए । आफूले बैकल्पिक सरकार बन्ने सम्भावना बारे पनि सोचेको र त्यस्तो नपाएपछि आफूसँग संसद विघटन बाहेक कुनै पनि विकल्प नरहेकोले विघटन गर्नुपरेकाे उनले प्रष्ट पारे ।

उनले भने ‘६४ प्रतिशत मत प्राप्त दलको सर्वसम्मत नेता । मेरा विरुद्ध संसदीय दलमा केही आलोचना, टिप्पणी पनि छैन । एक जना मान्छेले झुटो लान्छना पेश गरेका बाहेक मेरो विरुद्ध केही उजुरी पनि छैन । त्यस्तो अवस्थामा बैकल्पिक सरकार पनि बन्ने अवस्था रहेन । मसँग सिमीत बिकल्प मात्रै थिए ।’

निर्वाचनमा जानु प्रतिगमन नभएको पनि उनले जिकीर गरे । संसद विघटन नगरेर चुनावकाे मिति नताेकिएकाे भए अस्वस्थ राजनीतिक गतिविधि बढ्ने र राष्ट्रिय राजनीति प्रदूषित हुने भएकाले त्यसबाट बचाउनका लागि याे विकल्प राेजेकाे उनकाे भनाइ थियाे ।