काठमाडौं । नेकपा एमालेका सांसद खगराज अधिकारीले हतियार खरिद गर्न सुरक्षा निकायले माग गरेको र औचित्यसहित सरकारले संसदमा जानकारी दिनुपर्ने माग गरेका छन् । सांसद अधिकारीले बुधवारको बैंठकमा समय माग गरेर बोल्दै यस्तो माग राखेका हुन् ।

उनले विदेशी मुद्रा सञ्चिति घट्दै गएको अवस्थामा बजेटमार्फत नभएर बजेट रकामान्तर गरेर हतियार खरिद गर्नुपर्ने आवश्यकता किन भयो भन्नेबारे संसदमा प्रधानमन्त्री र गृहमन्त्रीले जानकारी दिनुपर्ने बताए । सांसद अधिकारीले जनतालाई छर्रा हान्नको निम्ति बदनाम इटालिको बेरेटा कम्पनीबाट हतियार किन किन्न्नुपर्ने हो ? भन्दै प्रश्न गरे । उनले हतियार कुनैपनि सुरक्षा निकायले माग नगरेको र प्रधकानमन्त्रीले बालुवाटार बोलाएर दबाब सिर्जना गरेको आरोप लगाए ।

सांसद अधिकारीले प्रधानमन्त्रीले दबाबमा विज्ञप्ति निकाल्न लगाएको आरोप लगाए । उनले के कारण त्तकाल एलसी खोल्ने, १० वर्ष प्रयोग गरेको हतियार किन खरिद गर्न लागेको हो भन्ने कुरा संसद जान्न चाहने भन्दै खरिद गरेको मूल्यसमेत जानकारी गराउन माग गरे । सरकारले जानकारी नदिएसम्म एमालेले हतियार खरिदको औचित्य पुष्टि गर्न माग गरिरहने बताए ।