ताप्लेजुङ । नेकपा एमालेका उपाध्यक्ष सुवासचन्द्र नेम्वाङले जित्नेको पहिचान गरी टिकट सिफारिस गर्न जिल्ला कमिटीलाई सुझाव दिएका छन् । नेकपा एमालेले आयोजना गरेको पार्टी प्रशिक्षण कार्यक्रमलाई सम्बोधन गर्दै उनले चारैतिरबाट घेराबन्दी भइरहेको बेला खुट्टा तान्ने प्रवृत्ति भए झन् क्षति हुने भएकाले त्यसो नगर्न जिल्लाका नेता तथा कार्यकर्तालाई सुझाव दिए ।

मंसिर ४ गते हुने प्रदेश र प्रतिनिधिसभा निर्वाचनमा जित्ने उम्मेदवार पार्टीको प्रमुख एजेन्डा भएको उनले बताए । ‘हामीले स्थानीय तह निर्वाचनलाई नजिकबाट नियालेका छौं,’ नेम्वाङले भने, ‘उम्मेदवार मिलाएको भए, आफ्नै खुट्टामा खुट्टा, पेन्टमा पेन्ट नअल्झाएको भए ५०/६० सिट बढी जित्थ्यौं ।’ अबको निर्वाचनमा त्यस्तो हुन नदिन सबै नेता, कार्यकर्ता एक हुन उनले आग्रह गरे ।