काठमाडौं । स्वास्थ्य तथा जनसंख्यामन्त्री पदम गिरीले कान्ती बाल अस्पतालमा बेड नपाएर बिरामी बाहिर जानुपर्ने अवस्थाको अन्त्य गर्ने प्रतिबद्धता जाहेर गरेका छन् । मन्त्री  गिरीले बालबालिकाहरुको गुणस्तरीय उपचारमा कमी हुन नदिन पनि कान्ती बाल अस्पताललाई निर्देशन दिए ।

स्वास्थ्य मन्त्रालयको जिम्मेवारी सम्हालेलगत्तै अस्पतालको निरीक्षणका लागि पुगेका उनले यस्तो निर्देशन दिएका हुन् । उनले कोही पनि बालबालिका सुलभ र गुणस्तरीय उपचार नपाएर भौंतारिनुपर्ने अवस्थाको अन्त्य गर्नुपर्ने बताए ।

उनले पछिल्लो समय कान्ती बाल अस्पतालमा आइसीयु बेड नपाउने गरेको गुनासोहरु धेरै आएको भन्दै जनताको गुनासोलाई समाधान गर्नेगरी अस्पतालमा आइसीयु बेडको संख्या बढाउन पनि निर्देशन दिए ।

उनले अस्पताललाई चुस्त सेवा दिने व्यवस्थाका लागि सरकारले गर्नुपर्ने सहयोग पूर्ण रुपमा सरकारबाट हुने पनि प्रतिवद्धता जनाए । उनले कान्ती बाल अस्पतालमा उपचारका लागि आएका बिरामीहरु बेड नपाएका कारण बाहिर जानुपर्ने अवस्थाको पूर्ण रुपमा अन्त्य हुनुपर्नेमा जोड दिए ।

उनले भने, ‘देशको एउटा मात्रै सरकारी बाल अस्पताल धेरै बिरामीहरु आउनुहुन्छ तर यहाँ भित्र बेड नपाएका कारणले बाहिर जानुपर्ने बाध्यत्मक अवस्था छ, यसलाई अन्त्य गर्न सक्नुपर्छ । जनगुनासो पनि त्यही किसिमले आएको छ । भर्ना गर्नसक्ने अवस्था छैन हामी बाहिर जानुपर्ने र महंगो तिर्नुपर्ने अवस्था छ भन्ने आएको छ । यो कुरालाई अन्त्य गर्नुपर्छ । आन्तरिक व्यवस्थापनलाई अधिकतम बालबालिकाको उपचार गर्ने कुरालाई प्राथमिकता दिने गरेर हुनुपर्छ । सरसफाईका समस्या समाधान गर्नुपर्छ । जनशक्तिमा कमी भए हामी पूरा गर्नेछौँ तर आएका बिरामीहरुले राम्रो गरी उपचार पाउनुपर्छ ।’

मन्त्रालयका कर्मचारीहरुले भने इक्वीपमेण्ट र ठाउँ प्रशस्त भएपनि आवश्यक जनशक्ति नभएको गुनासो गरेका थिए । मन्त्री गिरीले कोही पनि बालबालिकाहरु उपचार गर्न आउँदा उपचार नपाएर बाहिर जाने अवस्थाको अन्त्य गर्ने प्रतिवद्धता जनाए । मन्त्री गिरीले आजै राष्ट्रपति भवनमा शपथग्रहण गरी मन्त्रालयको कार्यभार सम्हालेका छन् ।