कोशी । प्रदेशको नाम कोशी राखिएकोप्रति विरोध जनाउँदै आन्दोलित रहेको पहिचार पक्षधर र प्रदश सरकारबीच आज सोमबार वार्ता भएको छ । विराटनगरको होटल विगमा सोमबार विहानदेखि झण्डै ५ घण्टा लामो छलफल भएको हो ।

सो वार्तापछि सञ्चारकर्मीहरुसँग कुराकानी गर्दै दुबै पक्षले छलफल अत्यन्तै सौहार्द्धपूर्ण भएको र फेरि वार्ताबाटै समाधन गर्ने बताएका छन् । दुबै पक्षबीचको सहमतिका आधारमा अर्को वार्ताको मिति तय गर्ने उनीहरुले बताए ।

सरकारको तर्फबाट वार्ता टोलीका संयोजक मन्त्री तिलकुमार मेन्याङ्बोले वार्तामा विषय प्रवेश भएको र पुनःवार्तामा बस्ने सहमति जुटेको जानकारी दिए। पहिचान पक्षधरका वार्ता टोली सदस्य रामभक्त कुरुङ्वाले वार्तामा विषय प्रवेश गरिएको बताउँदै फेरि अर्को वार्ता बस्ने सहमति भएको बताए ।

गत १७ फागुनमा प्रदेशको नाम कोशी राखेपछि पहिचान पक्षधर विभिन्न राजनीतिक दल र संघसंस्थाहरु आन्दोलित भएका थिए । उनीहरुले विराटनगर केन्द्रित आन्दोलन गरेका थिए । उनीहरुले शीर्ष नेता र कोशी प्रदेशसभा सदस्यलाई जिल्ला प्रवेशमा अवरोध गर्दै आइरहेका थिए ।

आन्दोलनरत पक्षका वार्ता टोली सदस्य ग्याल्जे शेर्पाले सरकारसँग वार्ता प्रारम्भ भएको र अर्को बैठकमा छलफल गर्ने समझदारी बनेको प्रतिक्रिया दिए ।