काठमाडौं । त्रिभुवन विश्वविद्यालयका उपप्राध्यापक प्रेम चलाउनेलाई आक्रमण गर्नेहरुमाथिको मुद्दा फिर्ता लिने निर्णयविरुद्ध जिल्ला अदालत, काठमाडौंबाहिर प्रदर्शन भएको छ ।
बृहत नागरिक आन्दोलनको ब्यानरमा भएको विरोध प्रदर्शनमा उपप्राध्यापक चलाउने आफैं पनि सहभागी छन् ।
प्रदर्शनमा उत्रिएकाहरुले ‘विश्वविद्यालयमा हुने अपराधीकरणको अन्त्य गरौं’, ‘न्याय हराए कहाँ जाने ?’ जस्ता नारासहितका प्ले कार्ड बोकेका छन् ।
गत २० असोज २०७७ मा उपप्राध्यापक प्रेम चलाउनेमाथि आक्रमण भएको थियो । उनीमाथि आक्रमण गरेको आरोपमा नेवि संघका हरि आचार्य, योगेन्द्र रावल लगायतविरुद्ध दायर भएको मुद्दा जिल्ला अदालत काठमाडौंमा विचाराधीन छ ।
सरकारले उक्त मुद्दा फिर्ता लिने निर्णय गरेपछि चलाउनेले हिजोदेखि अनसन थालेका छन् ।