काठमाडौं । सिनेमा हल व्यवसायीले काठमाडौं महानगरपालिकाका प्रमुख बालेन शाहविरुद्ध दायर रिटमाथिको सुनुवाइ उच्च अदालत पाटनका न्यायाधीश धीरबहादुर चन्दको एकल इजलासमा पेसी तोकिएको छ ।

सिनेमा हल व्यवसायीहरू प्रितम घिमिरेलगायतले हिजो उच्च अदालत पाटनमा मुद्दा दर्ता गराएका थिए । केन्द्रीय सरकारले हिन्दी सिनेमा ‘आदिपुरुष’ सेन्सर लगाएर चलाउन अनुमति दिएकोमा स्थानीय सरकारले रोक लगाउन नमिल्ने सिनेमा घर सञ्चालकहरूले बताउँदै आएका छन् ।

सिनेमा चलाउन दिने अधिकार संघ सरकारको हो कि स्थानीय सरकारको हो भन्दै उनीहरूले प्रश्न समेत उठाएका छन् । ‘आदिपुरुष’मा जानकी भारतकी छोरी हुन् भनि राखिएको संवादप्रत्ति आपत्ति जनाउँदै बालेनले उक्त संवाद हटाउन तीन दिनको अल्टिमेटम दिएका थिए ।

यद्यपि, सो समयभित्र संवाद नहटाएको भन्दै बालेनले महानगरभित्रका हलमा सोमबारदेखि ‘आदिपुरुष’ सहित कुनै पनि हिन्दी सिनेमा चलाउन नदिने निर्णय लिएका थिए ।

हिन्दी सिनेमा काठमाडौंमा प्रदर्शन गर्न रोक लगाउने बालेन र काठमाडौं महानगरलाई विपक्षी बनाई उनीहरुले हिजो रिट दायर गरेका हुन् ।

काठमाडौं महानगरकी शिक्षा सल्लाहकार रेशु अर्यालले बालेनको यही निर्णयप्रति असन्तुष्टि जनाउँदै हिजोमात्रै पदबाट राजीनामा दिएकी थिइन् ।

,‘दुर्भाग्यपूर्णरुपमा,केही ताजा कदम,निर्णय प्रक्रिया तथा उहाँको सिधा निर्देशनमा लिइएका निर्णयहरु मेरा मान्यताभन्दा विपरित थिए र यी कुराहरु मेरो घर परिवारसँग पनि सिधा जोडिएका थिए, जसले गर्दा स्वार्थको द्वन्द्व उत्पन्न हुने परिस्थिति आयो ।’ राजीनामामा रेशुले लेखेकी थिइन् । रेशुले स्वार्थको द्वन्द्व भनेर भारतीय चलचित्रमाथि लगाइएको रोकलाई ईंगित गर्न खोजेको हुनसक्ने अनुमान गरिएको छ ।

आदिपुरुषको विवादलाई लिएर काठमाडौंमा भारतीय चलचित्र रोक्ने निर्णयको उनी विरुद्धमा थिइन् । उनका श्रीमान भास्कर ढुंगाना नेपालको सबैभन्दा ठूलो मल्टिप्लेक्स चेन क्यूएफएक्सका सञ्चालक हुन् । ढुंगाना लगायतको टिम बालेनविरुद्ध अदालत जाने तयारीमा जुटेपछि रेशुले राजीनामा दिएको बताइएको छ ।