दार्चुला । ब्यास गाउँपालिका–४ डोकटस्थित महाकाली किनारमा बेवारिसे अवस्थामा शव भेटिएको छ । प्रहरीले मंगलबार बिहान नेपाल–भारत सीमा नदी किनारमा अन्दाजी १५ वर्षकी बालिकाको शव फेला परेको जनाएको छ ।

जिल्ला प्रहरी कार्यालयका अनुसार नदी किनारमा बालिकाको शव सढेको अवस्थामा भेटिएको छ । जिप्रका दार्चुलाका सूचना अधिकारी ज्ञानेन्द्रबहादुर सिंहले शव भारतीय नागरिकले देखेपछि नेपाल प्रहरीलाई सूचना दिएको बताए ।

उनले घटनाबारे थप अनुसन्धान गर्न सुन्सेरा प्रहरी चौकी तथा इलाका प्रहरी कार्यालय हुतीबाट प्रहरी सहायक निरीक्षक लोकेन्द्रसिंह कार्कीको टोली घटनास्थलमा पुगेको जानकारी दिए। शव कुहिएकोले पहिचानमा समस्या भएको प्रहरीले बताएको छ ।