काठमाडौं । संसदको प्रमुख प्रतिपक्षी दल नेकपा एमालेले सुन तस्करी प्रकरणमा नेकपा माओवादी केन्द्रका नेता कृष्णबहादुर महराका बाबुछोरामाथि किन अनुसन्धान भएन भनेर प्रश्न गरेको छ ।

आज बुधवारको प्रतिनिधिसभा बैठकको सुरुमै एमालेका प्रमुख सचेतक पदम गिरीले गएको पुसमा इलेक्ट्रिक सिगरेटभित्र आएको नौ किलो सुन तस्करी प्रकरणमा कृष्णबहादुर महरा र उनका छोराको नाम विभिन्न सञ्चारमाध्यममा आएको तर उनीहरूमाथि छानबिन नभएको भन्दै आपत्ति प्रकट गरेका हुन् ।

उनले सरकारकै संरक्षणमा क्विन्टलका क्विन्टल सुन तस्करी भएको पनि आरोप लगाए ।

गिरीले गृहमन्त्री नारायणकाजी श्रेष्ठको राजीनामा पनि माग गरेका छन् । गृहमन्त्रीले भाषण एउटा गर्ने तर तस्करको संरक्षण गर्ने गरेर दोहोरो भूमिका खेलेको भन्दै उनले राजीनामा माग गरे ।

एमालेले सुन तस्करीको विषयमा छानबिन गर्न समिति बनाउन सरकारसँग माग गरेको छ । दिउँसो १ बजेका लागि बोलाइएको बैठक दिउँसो ३ बजेमात्रै सुरु भएको हो ।