वीरेन्द्रनगर । जाजरकोटमा एक जना बालिका बलात्कृत भएकी छन् । जिल्लाकै ३० वर्षीय दीपक रोकायाले उनको घरमा कोही नभएको मौका छोपेर बलात्कार गरेको घटना भएको खुलेको छ ।

बालिकाका बुवा गोठालो गएको र आमा उपचारका क्रममा भारत रहेका बेला साउन ६ गते राति बालिकामाथि बलात्कार भएको उनका आफन्तले बताएका छन् ।

बालिकाका दाजु नाता पर्ने एक नातेदारका अनुसार घटना मिलापत्रका लागि बालिकाको परिवारमाथि चौतर्फी दबाब आइरहेको छ । घटना भएको ३ दिनपछि प्रहरीले मुद्दा गर्दा गरे पनि घटनाबारे चासो नदेखाएको उनले दुखेसो पोखे ।

उनले भने, ‘सुरुमा घटना भएपछि बालिकाका बुवालाई बलात्कार गर्ने पुरुषको आमाले तिलहरी दिएर बिहे गर्ने आश्वासन दिइन् । बालिकाका बुवाले नमानेपछि ३ लाख जति पैसा लिएर पनि आएका थिए । घटना मिलाउन गाउँपालिकाका अध्यक्ष, उपाध्यक्ष सबै लागिपरेका छन् । ’ उनले भने ।

सँगै बालिकालाई ई–कोन (आकस्मिक गर्भनिरोधक चक्की) खुवाउनु भनेको भिडियो समेत सार्वजिक भएको छ । ‘बालिकाका बुवालाई जिल्ला प्रहरी कार्यालयबाट फोन गरेर एक प्रहरीले डाक्टरले इकोन खुवाउनु भनेका छन्,’ भिडियोमा भनिएको छ ।

जिल्ला प्रहरी कार्यालय जाजरकोटका प्रहरी प्रमुख डिएसपी सन्तोष रोकाले बालिका बलात्कारको जाहेरीपछि दर्ता भएर घटनाका सम्बन्धमा थप अनुसन्धान भइरहेको बताए ।

उनका अनुसार २ जनालाई पक्राउ पुर्जी समेत जारी भएको छ । उनीहरु अहिलेसम्म समातिएका भने छैनन् । प्रहरी टोलीले खोजी गरिरहेको उनले बताए ।

डिएसपी रोकाले प्रहरीले ई–कोन खानु भनेको बारे भने आफूलाई जानकारी नभएको बताए ।