विराटनगर । कोशी प्रदेशमा सत्ता गठबन्धनबाट नेपाली कांग्रेस संसदीय दलका नेता उद्धव थापा दोस्रो पटक मुख्यमन्त्री नियुक्त भएका छन् । प्रदेश प्रमुख परशुराम खापुङले थापालाई आज (मंगलबार) साँझ मुख्यमन्त्रीमा नियुक्त गरेका हुन् ।
मंगलबार नै पौने ५ बजे थापाले प्रदेशसभाका ४७ सदस्यको आफूलाई समर्थन भएको भन्दै प्रदेश प्रमुख सामू दाबी पेश गरेका थिए । उनलाई कांग्रेस, माओवादी केन्द्र, एकीकृत समाजवादी र जनता समाजवादी पार्टीका प्रदेशका सांसदहरुले समर्थन दिएका छन् ।
एक महिना अघि मात्रै थापा सभामुखको हस्ताक्षरसहित मुख्यमन्त्री चयन भएका थिए । यद्यपि, उनको सो नियुक्ती गैरसंवैधानिक भन्दै सर्वोच्चले बदर गरिदिएको थियो ।
सत्ता गठबन्धनका तर्फबाट सभामुखलाई राजिनामा गराएर उनी पुनः मुख्यमन्त्री बनेका हुन् । ९३ सदस्यीय प्रदेशसभामा मुख्यमन्त्रीमा दाबी पेश गर्न ४७ सदस्यको समर्थन जरुरत पर्छ ।