काठमाडौं । काठमाडौंको बौद्ध र थली एरियामा गुण्डागर्दी गरेको अभियोगमा प्रहरीले ५ जनालाई समातेको छ ।सिन्धुपाल्चोक घर भएका श्याम बहादुर लामा, भीम बहादुर बस्नेत, गोविन्द गजमेर, प्रविण तामाङ र रामेछाप घर भएका बिक्की लामा उर्फ बाफ्ले पक्राउ परेका छन् ।

उपत्यका अपराध अनुसन्धान कार्यालयका एसएसपी डा. मनोज केसीले समूहमा हिँड्ने र धाकधम्की दिएर उनीहरुले थली र बौद्ध क्षेत्रमा गैरकानुनी रुपमा रकम माग्ने गरेको बताए । गुण्डागर्दीमा संलग्नहरुले सर्वसाधारणसँग विवाद गरेर डरत्रास र भय सिर्जना गर्ने गरेका थिए ।

समूहमा गएर उनीहरुले सर्वसाधारणलाई कुटपिट समेत गर्ने गरेको गुनासोका आधारमा हिजो (मंगलबार) अपराध अनुसन्धान कार्यालयले तीनीहरुलाई पक्राउ गरेको हो । आरोपीतहरुलाई थप अनुसन्धान र कारवाहीका लागि प्रहरी वृत्त बौद्धमा पठाइएको प्रहरीले जनाएको छ ।