कपिलवस्तु । कपिलवस्तुमा महिला कर्मचारीलाई जबरजस्ती करणी प्रयास गरेको आरोपमा स्वास्थ्य प्रमुखसहित २ जना पक्राउ परेका छन् । जिल्लाको आधारभूत स्वास्थ्य सेवा अस्पताल चन्द्रौटाका प्रमुख लेखनाथ पौडेल र शिवराज नगरपालिका– ३ बस्ने भुवन पाण्डे पक्राउ परेका हुन् ।
वडा प्रहरी कार्यालय चन्द्रौटाका प्रहरी निरीक्षक शेखरजंग मल्लले दुवै जनालाई महिलामाथि बलात्कार प्रयास गरेको आरोपमा पक्राउ गरिएको जानकारी दिए ।
१२ साउनमा राति डिउटीमा रहेकी महिला कर्मचारीमाथि मदिरा सेवन गरी बलात्कारको प्रयास गरेको भन्दै पीडितले प्रहरीमा उजुरी दिएकी थिइन् । उक्त उजुरीका आधारमा उनीहरुलाई पक्राउ गरिएको प्रहरीले जनाएको छ ।
प्रहरी निरीक्षक मल्लले पक्राउ परेका आरोपितहरुलाई आजै म्याद थप गरी कानुनी प्रक्रिया अघि बढाइने बताए । अस्पतालका प्रमुख पौडेललाई पक्राउ परेसँगै जिम्मेवारीबाट हटाइएको अस्पताल प्रशासनले बताएको छ ।