काठमाडौं । काठमाडौंको कपनमा खहरे खोला अतिक्रमण गरी बनाइएका घर हटाउने भन्दै काठमाडौं महानगरको डोजर पुगेपछि तनाव उत्पन्न भएको छ ।

काठमाडौं महानगरपालिका १० र बूढानीलकण्ठ नगरपालिका– ७ को सिमानामा रहेको साततले चोक नजिकैको खोला मिचेर घर बनाएको, सेटब्याक नछोडी खोला मिचेको पाइएकाले त्यो भत्काउन आएको महानगर प्रहरीका डिएसपी मिनबहादुर थापाले जानकारी दिए ।

सामाखुसी खोला जसरी नै यो खोला पनि खोल्ने योजना रहेको उनले बताए ।

तर बूढानीलकण्ठ नगरपालिका र त्यहाँका स्थानीयले डोजर चलाउन दिएका छैनन् । वर्षादको समयमा डोजर आतंक गरेको भन्दै उनीहरुले महानगरविरुद्ध नाराबाजी लगाउँदै प्रदर्शन गरिरहेका छन् । जसले गर्दा डोजर चलाउन सकिएको छैन ।

अहिले काठमाडौं महानगरपालिका, बूढानीलकण्ठ नगरपालिका र स्थानीयबासिन्दाबीच सहमति जुटाउन छलफल भइरहेको बताइएको छ ।