काठमाडौँ । उपप्रधान तथा गृहमन्त्री नारायणकाजी श्रेष्ठले माओवादी भएकै कारणले कुनै अपराधीले छुट नपाउने दाबी गरेका छन् ।

शनिबार जनतासँग माओवादी विशेष रुपान्तरण अभियान समुद्घाटन कार्यक्रमलाई ललितपुरको बाँडेगाउँमा सम्बोधन गर्दै उनले अनुसन्धानले अपराधी पुष्टि गरेमा माओवादी नै भए पनि कानुनको कठघरामा ल्याउने बताए ।

माओवादीको नेतृत्वको सरकार छ बाँचिन्छ भन्ने भ्रममा नपर्न उनले चेतावनी दिए । उनले भने,‘अहिले ६० किलो सुनको तस्करी र नौ किलो सुनको तस्करीको अनुसन्धान गरिरहेका छौँ । सरकारको कुरा के छ भने जोसुकै परोस् दोषी र अपराधी छन् भने अनुसन्धानले त्यसको पुष्टि गर्छ भने कानुनको कठघरामा ल्याउने छौँ । कुन पार्टीको कोसँग कस्तो सम्बन्धको मान्छे मतलब छैन ।’

कोही माओवादी भएपछि अपराध गरे पनि बाँचिन्छ होला माओवादीको नेतृत्वको सरकार छ भनेर नसोच्न उनले आग्रह गरे । अपराधी माओवादी भए पनि कारबाही हुने उनले बताए ।

माओवादी नै नेपालको सबैभन्दा अग्रगामी र राम्रो पार्टी भएको उनको दाबी छ । उनले सामाजिक न्याय समेतको समृद्धिको कार्यनीति लागू गर्न र समाजवादीको रणनीतिलाई अँगाल्नमा आवादीको नेतृत्वले मात्र सम्भव भएको उनले जिकिर गरे ।

उनले भने,‘माओवादी नै नेपालको सबै पार्टीमध्ये सबैभन्दा अग्रगामी र राम्रो पार्टी हो । र, हाम्रो पार्टीले राष्ट्रिय कार्यभार पूरा गर्न सक्छ । अहिले सामाजिक न्याय समेतको समृद्धिको कार्यनीति लागू गर्न र समाजवादको रणनीतिलाई अँगाल्न नेपालमा हाम्रो पार्टीको नेतृत्वले मात्र सम्भव छ ।’

मन्त्री श्रेष्ठले सरकारले अहिले भ्रष्टाचार र तस्करीविरुद्धको अभियान चलाइराखेको भन्दै त्यसले आमजनतामा आशा पैदा गरेको बताए ।