काठमाडौँ । शिक्षा, विज्ञान तथा प्रविधि मन्त्रालयले नेपाल शिक्षक महासंघलाई विद्यालय बन्दका कार्यक्रम स्थगन गरेर वार्तामा आउन आग्रह गरेको छ ।
मन्त्रालयका सहसचिव भगवान अर्यालले आज एक विज्ञप्ति जारी गर्दै महासंघले आन्दोलनका कार्यक्रम घोषणा गरेको प्रति मन्त्रालयको गम्भीर ध्यानाकर्षण भएको जनाएको हो । महासंघले अघि सारेका मागहरुलाई सकारात्मक रुपमा लिँदै सम्बोधन गर्न सरकार तयार रहेको उक्त विज्ञप्तिमा उल्लेख गरिएको छ ।

“नेपाल सरकारले विद्यालय शिक्षा विधेयक, २०८० संसदमा दर्ता गरिसकेको छ । विधेयकलाई अन्तिम रुप दिनुअघि नेपाल शिक्षक महासंघका पदाधिकारीसँग विभिन्न चरणमा छलफल भएको र महासंघले पेस गरेको विद्यालय शिक्षक तथा कर्मचारीको पेशागत हकहितसँग सम्बन्धित सुझावहरुलाई यथाशक्य विधेयकमा समावेश गरिएको छ । नेपाल शिक्षक महासंघले उठाएका कतिपय मागहरु विधेयक पारित भएपश्चात तर्जुमा हुने नियमावली तथा नेपाल सरकारको नीतिगत निर्णयबाट समेत सम्बोधन हुने प्रकृतिका रहेका छन् । महासंघले अघि सारेका मागहरुलाई सकारात्मक रुपमा लिई यथोचित सम्बोधन गर्न नेपाल सरकार तयार नै छ ।
अतः महासंघले आकस्मिक रुपमा संविधान दिवसको दिनबाट घोषणा गरेको विद्यालय बन्द र आन्दोलनका कार्यक्रम स्थगन गरी माननीय शिक्षा, विज्ञान तथा प्रविधिमन्त्री ज्यूको संयोजगत्वमा मिति २०८० साल आश्विन २ गते दिउँसो ३ बजे मन्त्रालयमा हुने वार्तामा सहभागि हुन नेपाल शिक्षक महासंघलाई मन्त्रालय हार्दिक आग्रह गदर्छ ।” विज्ञप्तिमा भनिएको छ ।