कैलाली । आफैलाई भ्रष्ट करार गरेका सुदूरपश्चिम प्रदेशको वन निर्देशनालयका तत्कालीन निर्देशक कृष्ण भट्टमाथिको छानबिन सकिएको छ । भट्टको सम्बन्धमा छानबिन गर्न गठित प्रदेशसभाको सार्वजनिक लेखा उपसमितिले आफ्नो छानबिन सकाएर प्रतिवेदन बुझाएको हो ।
भट्टसँग सोधखोजसहितको अनुसन्धान र छानबिन गरेको सो समितिले भदौ १९ गते प्रतिवेदन सार्वजनिक लेखा समितिलाई बुझाएको उपसमितिका संयोजक मानबहादुर धामीले हामीलाई जानकारी दिनुभयो । उहाँका अनुसार उपसमितिले भट्टले आचरण र मर्यादाविपरीत काम गरेकोले आर्थिक अख्तियारीसहितको जिम्मेवारी रोकिनुपर्छ भनेर सिफारिस गरेको छ ।
यस्तै भट्टले तथानाम बोलेको अडियो÷ भिडियोलाई पनि फरेन्सिक टेस्ट गरि सत्यतथ्य छानबिन गरेर कारबाहीका लागि अख्तियारको केन्द्रीय कार्यालयलाई पत्र लेख्ने निर्णय सिफारिस गरेको धामीले बताउनुभयो । भट्टले सोधपुछका क्रममा भने सो अडियो र भिडियोमा भएको आवाज आफ्नो नभएको भन्दै इन्कारी बयान दिनु भएको बताइएको छ । अब सो उपसमितिको निर्णयमा लेखा समितिले पुनर्विचार अथवा कार्यान्वयन के गर्छ ? त्यो भने हेर्न बाकी छ ।
यस्तै भट्टलाई यसअघि नै कारबाहीस्वरुप मन्त्रालय तानिएको थियो । विभागीय मन्त्रीलाई गालीगलौज गरेको र मातहतका जिल्लाका वन कार्यालयबाट घुस रकम असुली गरेको भिडिओ सार्वजनिक भएका भट्टलाई अनुसन्धानका क्रममा मन्त्रालय तानिएको हो । केही समयअघि भट्टले आफूले आफैंलाई भ्रष्ट करार गर्नेगरी जिल्लाका डिभिजन वन कार्यालयबाट पैसा उठाएको कुरा बोल्दै गरेको भिडिओ नै सार्वजनिक भएको थियो ।
उहाँले डिभिजन वन कार्यालयबाट रकम उठाउने गरेको कुरा बोलेको भिडिओ र अडियोका सम्बन्धमा अहिले अख्तियारले समेत छानविन गरिरहेको जनाएको छ । उता अख्तियार दुरुपयोग अनुसन्धान आयोगले पनि भट्टमाथि छानबिन थालेको छ । महेन्द्रनगरस्थित अख्तियारको कार्यालयले भट्टले मातहतका डिभिजन वन कार्यालयबाट रकम तोेकेरै उठाएको बताएको भिडिओ सार्वजनिक भएपछि भट्टमाथि छानबिन अघि बढाइएको जनाएको छ ।
अख्तियार महेन्द्रनगरका प्रमुख आशमान तामाङले भट्टमाथि छानबिन भइरहेको जानकारी दिनुभयो । खासगरी वन निर्देशनालयको तत्कालीन निर्देशक रहेकै बेला हेमराज विष्ट भ्रष्टाचार मुद्दामा मुछिएपछि भट्टले निमित्त वन निर्देशकको जिम्मेवारी पाउनु भएका थियो । गत साउनमा विशेष अदालतबाट सफाइ पाएपछि विष्ट वन निर्देशकको जिम्मेवारीमा फर्किनु भएको थियो । उहाँभन्दा वरिष्ठ अधिकृत विष्टले अदालतबाट सफाइ पाएर पहिलेकै जिम्मेवारीमा फर्किएपछि पनि भट्टले निमित्त निर्देशक बन्ने चाहाना राख्नु भएको थियो । नेपाली कांग्रेस निकट मानिने भट्टको निमित्त निर्देशक बन्ने चाहाना पूूरा गर्न मुख्यमन्त्री कमलबहादुुर शाह र भौतिक पूर्वाधार विकास मन्त्री प्रकाश देउवाको जोडबलमा विष्टको मन्त्रालयमा सरुवा गरिएको स्रोतले बतायो । विष्टको सरुवा भएपनि उहाँ अहिले वन निर्देशनालयको निर्देशककै रुपमा काम गरिरहनु भएको छ ।