काठमाडौँ । लामो समयदेखि प्रहरीको खोजी सूचीमा रहेका रामबहादुर बम्जनलाई केन्द्रीय अनुसन्धान ब्यूरो (सिआइबी) ले पक्राउ गरी आज पत्रकार सम्मेलन मार्फत सार्वजनिक गरेको छ ।

पक्राउ रामबहादुर बम्जनको घरबाट रु ३ करोड ३४ लाख ३७ हजार नौँ सय ६ बरामद गरिएको केन्द्रीय अनुसन्धान ब्युरो (सिआईबी) ले पत्रकार सम्मेलन गरी सो कुराको जानकारी गराएको हो ।

नेपाल प्रहरीले बिसं २०७६ सालमा नै सर्लाहीमा एक नाबालिकामाथि यौनदुराचार गरेको अभियोग लागेका बम्जनलाई खोजी गर्दै आएकोमा हिजो मङगलवार साँझ ७ बजे उनको काठमाडौँको हात्तीगौंडास्थित निवासबाट पक्राउ गरेको सिआईबीका प्रहरी वरिष्ठ उपरीक्षक (एसएसपी) दिनेश आचार्यले जानकारी दिनुभयो ।

उहाँका अनुसार अनुसन्धानको क्रममा उनको घरबाट ठूलो धनराशी बरामद गरिएको र बरामद गरिएका नगद राशिमध्ये १७ देशका विभिन्न मुद्राहरु रहेको र त्यसको नेपाली रकम रु ३० लाख ९२ हजार चार सय ६ हुन आउछ । त्यसैगरी प्रहरीले उनको घरबाट १४ थान मोबाईल, ५ थान आईप्याड, २ वटा गाडी र ४ वटा मोटरसाईकल पनि फेला पारेको आजको पत्रकार सम्मेलनमार्फत जानकारी दिइएको थियो ।

बम्जनविरुद्ध आश्रममा बस्ने अनुयायीको हत्या गरेको, बेपत्ता पारेको तथा यौनहिंसा गरेको आरोपमा प्रहरीमा उजुरी परेको छ ।
जिल्ला अदालत सर्लाहीले बिसं २०७६ साल माघ २३ गते पक्राउ पुर्जी जारी गरेयता प्रहरीले बम्जनको खोजी गरिरहेको थियो । तीन युवती र दुई युवालाई बेपत्ता पारेको आरोपमा उनीविरुद्ध विभिन्न प्रहरी कार्यालयमा उजुरी दर्ता भएको प्रहरीले जनाएको छ ।
शुरुमा लामो समय बाराको हलखोरियामा रहेको जङ्गलमा बसेका बम्जन पछि सिन्धुलीको कमलामाई नगरपालिका–८ मा जङ्गल अतिक्रमण गरी आश्रम बनाएर बस्दै आएका थिए । बम्जलाई पक्रन प्रहरी टोलीले बिसं २०७७ सालको असार ४ गते सिन्धुलीको आश्रममा छापा मारेको भए पनि पक्राउ गर्न सफल भएको थिएन । बम्जनलाई जिल्ला अदालत सर्लाहीमा उपस्थित गराउने तयारी गरिएको सिआईबीका प्रहरी वरिष्ठ उपरीक्षक आचार्यले बताउनुभयो ।

उहाँले भन्नुभयो, “लामो अनुसन्धान र प्रयासपछि केन्द्रीय अनुसन्धान ब्युरोद्वारा रामबहादुर बम्जन भनिने रामलाल बञ्जनलाई हिजो बेलुकी हात्तिगौँडाबाट पक्राउ गर्न सफल भएका छौँ । जिल्ला अदालत सर्लाहीमा उपस्थित गराउछौँ ।” ब्युरोले सकभर आजै बम्जनलाई सर्लाही जिल्ला अदालतमा उपस्थित गराउने तयारी रहेको जनाएको छ ।

बम्जनको घरबाट बरामद भएको १७ देशको विदेशी मुद्रासहितको ठूलो धनराशीबारे पनि थप अनुसन्धान गरी तत्काल कारबाही प्रक्रिया अघि बढाईने सिआईबीका प्रहरी वरिष्ठ उपरीक्षक आचार्यले जानकारी दिनुभयो ।