काठमाडौँ । राष्ट्रिय युवासंघ नेपालको आयोजनामा केपी ओली कप फुटबल आज केही बेरपछि शुरु हुँने भएको छ । एन्फा कमप्लेक्स सातदोबाटोमा हुने उक्त फुटबल प्रतियोगिता नेकपा (एमाले) का अध्यक्ष केपी शर्मा ओलीले उद्घाटन गर्नु हुने छ ।

उद्घाटन समारोहमा पूर्वराष्ट्रपति विद्यादेवी भण्डारी लगायत विशिष्ट व्यक्ति, एन्फा, राष्ट्रिय खेलकुद परिषद्का प्रतिनिधि, खेलाडी र कलाकार सहभागी हुने कार्यक्रमतय भएको छ । खेलमा नेपालका सातवटा ‘ए’ डिभिजन, दुई विदेशी तथा एक आयोजक गरी १० वटा टिमले सहभागिता जनाउने आयोजकले जनाएको छ ।

नेपालका सात टिममा जावलाखेल युथ क्लब, न्युरोड टिम एनआरटी, थ्रीस्टार, नेपाल पुलिस, त्रिभुवन आर्मी, चर्च ब्वाइज युनाइटेड, मच्छिन्द्र क्लब, दुई विदेशी क्लबमा दिल्ली एफसी, पश्चिम बंगाल क्लब र आयोजक केपी एफसी क्लबले सहभागिता जनाउनेछन् । सेमिफाइनल र फाइनल खेलबाहेक सबै खेल एन्फा सातदोबाटोमा हुने जनाइएको छ ।

१७ गते हुने सेमिफाइनल र १९ गते हुने फाइनल प्रतियोगिता भने दशरथ रंगशाला त्रिपुरेश्वरमा हुने भएको छ । विजेता टोलीले ११ लाख रुपैयाँ पुरस्कार पाउने छ भने उपविजेताले ५ लाख, उत्कृष्ट खेलाडीलाई एक लाख, उत्कृष्ट गोलरक्षक, उत्कृष्ट गोलकर्ता र उत्कृष्ट उदीयमान खेलाडीलाई ५०÷५० हजार रुपैयाँ प्रदान गरिने आयोजकले जनाएको छ ।