काठमाडौँ । पश्चिम एसियाली फुटबल एसोसिएसन (वाफ) महिला फुटबल च्याम्पियनसिपको फाइनल खेल आज हुँदै छ ।

साउदी अरेबियामा जारी उक्त प्रतियोगिताको फाइनल खेलमा आज बिहीबार नेपालले जोर्डनको सामना गर्दै छ ।

खेल नेपाली समय अनुसार, राति ९ः४५ बजे सुरु हुनेछ ।

फाइनल खेलमा स्ट्राइकर सावित्रा भण्डारी ‘साम्बा’ भने अनुपस्थित रहने छिन् । अखिल नेपाल फुटबल संघ (एन्फा) का अनुसार, सावित्रा फ्रान्सेली क्लब ईभी गुइनगाम्पबाट व्यावसायिक फुटबल खेल्छिन् ।

विश्व फुटबल महासंघ (फिफा) को नियम अनुसार, राष्ट्रिय टोलीको खेल फिफा विन्डोमा रहेको अवस्थामा मात्र खेलाडीले देशको प्रतिनिधित्व गर्नुपर्ने हुन्छ । वाफ च्याम्पियनसिपको फाइनलअघिको खेलमात्र फिफा विन्डोमा रहेको थियो ।

तर, वाफ च्याम्पियनसिपको फाइनल खेल भने फिफा विन्डोभन्दा बाहिर रहेकाले सावित्रा भण्डारीले खेल नखेल्ने भएकी हुन् ।

जारी वाफ च्याम्पियनसिपमा सावित्राले नौ गोल गरिसकेकी छन् । उनी जारी प्रतियोगितामा सर्वाधिक गोल गर्ने खेलाडी पनि हुन् ।

नेपालले समूहगत चरणमा तीनवटै खेल जितेको थियो । नेपालले पहिलो खेलमा सिरियालाई ४–१, इराकलाई ५–० र प्यालेस्टाइनलाई ४–० गोलले हराएको थियो । जारी प्रतियोगितामा नेपालले १५ गोल गरिसकेको छ भने दुई गोल खाएको छ ।

जारी प्रतियोगितामा जोर्डन पनि बलियो टोलीका रुपमा देखिएको छ ।