काठमाडौं । सांग्रिला हस्पिटालिटी ग्रुपले पोखराको बेगनासमा लक्जरी रिसोर्ट सञ्चालनमा ल्याउने भएको छ ।
अहिले ग्रुपले रिसोर्टको निर्माण गरिरहेको छ । सांग्रिला होटल सञ्चालन गरिरहेको ग्रुपले १ अर्ब ४९ करोड ५० लाख रुपैयाँ लगानीमा लस्ट होराइजन प्रालि रिसोर्ट सञ्चानलमा ल्याउन लागेको हो ।
रिसोर्टले १ अर्ब ७ करोड ६० लाख रुपैयाँ ऋणको रेटिङ गराएको छ । रिसोर्ट सन् २०२६ डिसेम्बरभित्र सञ्चालनमा ल्याउने तयारी भएको ग्रुपले जनाएको छ ।
अहिलेसम्म रिसोर्टको ५६ प्रतिशत वित्तीय प्रगति भएको ग्रुपले जानकारी दिएको छ । ७३ प्रतिशत बैंकको ऋण र बाँकी २८ प्रतिशत संस्थापकले स्वपुँजी (इक्विटी) हुने गरी लगानी संरचना तयार पारिएको छ । परियोजनाको महत्वपूर्ण डिजाइन र स्कोप परिमार्जनपछि लागत बढेको छ ।
जनवरी २०२४ को मध्यसम्ममा ७२ करोड ४० लाख रुपैयाँ थियो । संस्थापकहरुले अझै ३७ प्रतिशत स्वपुँजी लगानी गर्न बाँकी छ । ऋण र इक्विटी व्यवस्थापनमा भएको ढिलाइले रिसोर्टको काम पनि पछि धकेलिँदै आएको छ । लक्जरी रिसोर्ट बन्न भएको ढिलाइले प्रतिकोठा लागत बढेर ३ करोड ९० लाख रुपैयाँ पुग्ने अनुमान गरिएको छ ।
होटलमा ४० कोठाहरु बन्ने भएको छ । जसमध्ये दुईटा स्वीट रुम हुने ग्रुपले जानकारी दिएको छ । होटल व्यवस्थापनको जिम्मा इन्टरकन्टिनेन्टल होटल्स ग्रुप (आइएचजी) ले लिएको छ । विकासकर्ता लस्ट होराइजन र आइएचजीबीच सन् २०२२ डिसेम्बरमा रिसोर्टको व्यवस्थापन जिम्मेबारीमा लिने सम्झौता भएको थियो ।
रिसोर्ट इन्टरकन्टिनेन्टल रिसोर्ट पोखरा बेगनास ब्राण्डमा सञ्चालन हुने ग्रुपले जनाएको छ । इन्टरकन्टिनेन्टल होटल्स ग्रुप प्रमुख युरोपेली होटल समूहहरुको होटल व्यवस्थापन सम्झौतामार्फत रिसोर्टलाई साझेदारी गर्न सक्षम पार्दै आइएचजीको ब्रान्ड नाम स्थापित छ । फ्रेंचाइजीले रिसोर्टको व्यवसाय विस्तारमा सहयोग पुर्याउने अपेक्षा गरिएको छ ।
बेगनासमा परियोजनाको अनुकूल स्थानबाट आराम प्राप्त गर्न सकिन्छ । नेपाल घुम्न आउने आन्तरिक तथा बाह्य पर्यटकमाझ बेगनास लोकप्रिय रहेको क्षेत्र हो । अनुमानित लागत र समयरेखाभित्र परियोजना पूरा गर्न कम्पनीको क्षमता र त्यसपछि पर्याप्त मार्जिन कायम राख्नु मुख्य मूल्याँकन संवेदनशीलता रहनेछ ।
रिसोर्ट व्यवसायी प्रसिद्धबहादुर पाण्डे र प्रविनबहादुर पाण्डेले सञ्चालनमा ल्याउन लागेका हुन् । ग्रुपले काठमाडौं र पोरखामा दुईटा पाँचतारे होटल निर्माण गरिरहेको छ ।