काठमाडौँ । कतारका राजा अमिर शेख तमिम बिन हमाद अल थानीलाई अति विशिष्ट स्तर (क श्रेणी) को सुरक्षा प्रदान गरिने भएको छ । उक्त सुरक्षा नेतृत्व नेपाली सेनाले गर्ने भएको छ ।

उक्त सुरक्षामा सेनाका स्नाइपरदेखि बम डिस्पोजल टोली तैनाथ रहने भएका छन् । विशिष्ट व्यक्ति सुरक्षा कार्यविधि, २०७७ मा व्यवस्था भए बमोजिम सेनाको नेतृत्वमा सुरक्षा प्रदान गर्न लागिएको बताइएको छ ।

विशिष्ट व्यक्तिको क्लोज सेक्युरिटीमा सेनाको पार्शववर्ती र अति विशिष्ट व्यक्ति सुरक्षा निर्देशनालयबाट टोली खटिने जनाइएको छ । बाहिरी सुरक्षामा नेपाल प्रहरी, सशस्त्र प्रहरी बल र राष्ट्रिय अनुसन्धान विभाग खटिने भएको छ ।

कतारका राजा अमिर शेखको सडकमा सवारीका बेला सबैभन्दा अग्रभागमा प्रहरी वार्निङ मोटरसाइकल, प्रहरीको अगुवा जीप, १८ जना आउट राइडर्स, विशिष्ट व्यक्ति, विशिष्ट व्यक्तिको पछुवा कार, फेरि आउट राइडर्स र जगेडा कार समेत रहने जनाइएको छ ।

आपतकालीन अवस्थाका लागि एम्बुलेन्स, प्रहरी जीप, पछुवा कार पनि सवारीका बेला साथमै रहनेछन् ।