काठमाडौँ । काठमाडौँ महानगरपालिकाले नेपालको जुनसुकै पालिकाका अशक्त र गरिब नागरिक बिरामीको उपचार गर्ने भएको छ ।
महानगरका प्रमुख बालेन शाहले आज सामाजिक सञ्जाल फेसबुकमा स्टाटस राख्दै देशका जुनसुकै पालिकाका अशक्त र गरिब नागरिक बिरामीको आवश्यकता अनुसार निशुल्क उपचार गर्ने जानकारी दिएका हुन् ।
उनले अशक्त र गरिब नागरिक बिरामीहरूले आफ्नो पालिकाबाट विपन्न, असहायको सिफारिस लिएर काठमाडौँ महानगर आउन अनुरोध गरेका छन् । उनले भनेका छन्- ‘हामीसँग ४३ अस्पतालका ३२३ बेड आवद्ध छन् । त्यहाँ बिरामीको आवश्यकता अनुसार निशुल्क उपचार हुनेछ । तपाईको टोल छिमेक वा आफन्ताहरू यो वर्गमा पर्नुहुन्छ भने खबर गरिदिनुहोला ।’
उनले ११८० मा सम्पर्क गर्न सकिने वा काठमाडौँ महानगर स्वास्थ्य विभागमा सम्पर्क गर्न भनेका छन् ।